भिवंडी : भाजपकडून महिलांच्या सन्मान आणि सुरक्षेच्या नावाने राजकीय घोषणांचा डंका पिटला जात असताना ठाणे जिल्ह्यातील भिवंडी तालुक्यातून समोर आलेल्या एका गंभीर प्रकरणाने खळबळ उडाली आहे. भाजप माजी आमदार नरेंद्र पवार आणि बडतर्फ पोलीस कर्मचारी शैलेश पाटीलविरोधात एका २२ वर्षीय विवाहित महिलेवर सामूहिक लैंगिक अत्याचार केल्याप्रकरणी पडघा पोलिस ठाण्यात गुन्हा दाखल करण्यात आला आहे. शस्त्राचा धाक दाखवून जबरदस्तीने दारू पाजल्याचा आणि त्यानंतर लैंगिक अत्याचार केल्याचा गंभीर आरोप पीडितेने केला आहे.
मिळालेल्या माहितीनुसार, पीडित महिलेचा पतीसोबत वाद सुरू होता. हा वाद मिटवण्यासाठी मध्यस्थी करण्याच्या नावाखाली माजी आमदार नरेंद्र पवारने तिला आपल्या कार्यालयात बोलावले. त्यानंतर १३ सप्टेंबर रोजी नरेंद्र पवार आणि शैलेश पाटील यांनी तिला भिवंडी तालुक्यातील बापगाव येथील खासगी मालमत्तेवर नेल्याचा आरोप तिने केला आहे. तेथे शस्त्राचा धाक दाखवून तिला जबरदस्तीने दारू पाजण्यात आली आणि तिच्यावर लैंगिक अत्याचार करण्यात आल्याचे पीडितेने तक्रारीत म्हटले आहे.
घटनेनंतर पीडित महिलेने पडघा पोलिस ठाण्यात धाव घेतली. तिच्या तक्रारीवरून नरेंद्र पवार आणि शैलेश पाटीलविरोधात सामूहिक अत्याचाराचा गुन्हा दाखल करण्यात आला असून पोलिसांकडून या प्रकरणाचा पुढील तपास सुरू आहे.
पीडित महिलेने या प्रकरणात न्यायाची मागणी केली आहे. संबंधित आरोपींनी अशाच पद्धतीने आणखी किती महिलांचे आयुष्य उद्ध्वस्त केले असेल, असा सवाल करत तिने आरोपींवर कठोर कारवाई करण्याची मागणी केली आहे.
