अहिल्यानगर जिल्ह्यातील संगमनेर तालुक्यातील खरशिंदे गावात घडलेल्या एका थरारक घटनेने संपूर्ण परिसर हादरला असून, ६५ वर्षीय गंगुबाई गायकवाड यांच्या धाडसाची सर्वत्र चर्चा रंगली आहे. मातृत्व, प्रसंगावधान आणि धैर्य यांचा प्रत्यय देणारी ही घटना गावकऱ्यांसाठीच नव्हे तर संपूर्ण समाजासाठी प्रेरणादायी ठरत आहे.
गंगुबाई गायकवाड या आपल्या घरात चुलीजवळ काम करत होत्या. त्याचवेळी अचानक एक बिबट्या भरधाव वेगाने त्यांच्या घरात शिरला. काही क्षणांसाठी संपूर्ण परिस्थिती भयावह बनली. कारण घराच्या मुख्य दरवाजालगतच त्यांचा मुलगा हरिभाऊ गायकवाड गाढ झोपेत होता. बिबट्याची दिशा थेट झोपलेल्या मुलाकडे असल्याचे लक्षात येताच गंगुबाईंनी क्षणाचाही विलंब न लावता प्रसंगावधान दाखवले. स्वतःच्या जीवाची पर्वा न करता त्यांनी झोपलेल्या मुलाला बिछान्यासह घराबाहेर ओढून सुरक्षित ठिकाणी नेले. एवढ्यावरच त्या थांबल्या नाहीत. मुलाला बाहेर काढताच त्यांनी अत्यंत चातुर्याने घराचा दरवाजा बाहेरून बंद करत बिबट्याला घरातच कैद केले.
एका वृद्ध महिलेने दाखवलेले हे धैर्य पाहून गावकरीही थक्क झाले. घटनेची माहिती मिळताच वन विभागाचे पथक तातडीने घटनास्थळी दाखल झाले. स्थानिक ग्रामस्थांच्या मदतीने रेस्क्यू ऑपरेशन राबवण्यात आले. अखेर अनेक तासांच्या प्रयत्नांनंतर बिबट्याला सुखरूप पिंजऱ्यात जेरबंद करण्यात वन विभागाला यश आले.
एका आईने संकटाच्या क्षणी दाखवलेले धाडस आणि मुलाच्या जीवासाठी घेतलेला जीवघेणा निर्णय यामुळे गंगुबाई गायकवाड या आज संपूर्ण परिसरात चर्चेचा विषय ठरल्या आहेत. भीतीच्या वातावरणातही त्यांनी दाखवलेले धैर्य हे केवळ एका आईचे प्रेम नसून संकटासमोर न झुकणाऱ्या ग्रामीण स्त्रीशक्तीचे जिवंत उदाहरण असल्याची भावना नागरिकांकडून व्यक्त होत आहे.
