लातूर : देशभरात खळबळ उडवून देणाऱ्या NEET पेपरफुटी प्रकरणाच्या तपासात सीबीआयने महाराष्ट्रात धाडसत्र सुरूच ठेवले असून पुणे, नाशिक, अहिल्यानगर आणि लातूर जिल्ह्यातील अनेक संशयितांना ताब्यात घेतले आहे. या प्रकरणात लातूर कनेक्शन अधिक गडद होत असल्याचे चित्र समोर येत असून, सीबीआयने शहरातील हालचालींना पुन्हा वेग दिला आहे. आरसीसी या खासगी कोचिंग क्लासेसचे संचालक शिवराज मोटेगावकर यांना चौकशीनंतर अटक करण्यात आल्याची माहिती समोर आली आहे.
शुक्रवारी तब्बल ११ तास त्यांची कसून चौकशी करण्यात आली होती. त्यानंतर सीबीआयचे पथक त्यांच्या ट्युशन क्लासमध्ये दाखल झाले होते. या कारवाईदरम्यान अनेक महत्त्वाची कागदपत्रे, संगणक आणि मोबाईल फोन जप्त करण्यात आले. आज सकाळी पुण्यातील सीबीआय कार्यालयात त्यांना ताब्यात घेतल्यानंतर अधिकृत अटक करण्यात आली.
दरम्यान, लातूरमधील ट्युशन परिसरात मोठ्या प्रमाणात पोलीस बंदोबस्त तैनात करण्यात आला आहे. काल दुपारपासून सीबीआयने शहरातील विविध ठिकाणी छापेमारी करत डिजिटल पुरावे आणि कागदपत्रांची तपासणी केली. सेवानिवृत्त प्राध्यापक पी. व्ही. कुलकर्णी यांना ताब्यात घेतल्यानंतर या तपासाला आणखी महत्त्व प्राप्त झाले आहे. शुक्रवारी पहाटेपासून सीबीआयचे अधिकारी शिवराज मोटेगावकर यांच्या सुतमील परिसरातील निवासस्थानी दाखल झाले होते.
घरातील कागदपत्रे, विद्यार्थ्यांच्या नोंदी तसेच इलेक्ट्रॉनिक उपकरणांची तपासणी करण्यात आली. त्यानंतर उद्योग भवन परिसरातील आरसीसी कार्यालयातही तपास करत विविध माहिती आणि नोंदी गोळा करण्यात आल्याची माहिती समोर आली होती. आजही सीबीआयचे पथक आरसीसी कार्यालयात तपास करत असून संपूर्ण कारवाईबाबत मोठ्या प्रमाणात गुप्तता पाळली जात आहे. लातूर पोलिसांचा तगडा बंदोबस्त आणि सीबीआय अधिकाऱ्यांची उपस्थिती यामुळे परिसरात तणावाचे वातावरण निर्माण झाले आहे.
या प्रकरणात सीबीआयकडून सलग चौकशी आणि छापेमारी सुरू असून आणखी काही महत्त्वाचे धागेदोरे हाती लागल्याची चर्चा आहे. मात्र, तपासादरम्यान नेमके काय पुरावे मिळाले, पुढील कारवाई कोणावर होणार किंवा नवीन गुन्हे दाखल होणार का, याबाबत अधिकृत माहिती अद्याप देण्यात आलेली नाही.
NEET पेपरफुटी प्रकरणातील लातूर कनेक्शन समोर आल्यानंतर सीबीआयने तपासाची व्याप्ती वाढवली असून पुढील काही दिवसांत आणखी धक्कादायक खुलासे होण्याची शक्यता व्यक्त केली जात आहे. दरम्यान, लातूरमधील विविध ट्युशन क्लासेसच्या बाहेर पोलिसांचा कडेकोट बंदोबस्त ठेवण्यात आला असून आरसीसी क्लासबाहेरही मोठ्या प्रमाणात पोलीस तैनात करण्यात आले आहेत.
