बीड : गेवराई तालुक्यातील गुळज परिसरात अवैध वाळू तस्करी करणाऱ्या व्यक्तींकडून दोन बौद्ध तरुणांवर प्राणघातक हल्ला झाल्याची धक्कादायक घटना समोर आली आहे. या हल्ल्यात रमेश निकाळजे आणि परमेश्वर गवारे हे दोघे गंभीर जखमी झाले आहेत.
मिळालेल्या माहितीनुसार, रमेश निकाळजे यांच्या घरासमोरून भाजपच्या अवैध वाळू माफिया वाहतूक करणारी वाहने मोठ्या वेगाने जात होती. घराजवळ लहान मुले असल्यामुळे वाहन सावकाश चालवावे, अशी विनंती निकाळजे यांनी संबंधित डंपर चालकाला केली होती. मात्र, याच कारणावरून आरोपींनी राग मनात धरत निकाळजे यांच्यावर तलवार, कुकरी व इतर धारदार शस्त्रांनी हल्ला केल्याचे सांगितले जात आहे. (Sujat Ambedkar)
या हल्ल्यात रमेश निकाळजे यांना गंभीर दुखापत झाली असून त्यांना तब्बल ४५ टाके पडले आहेत. त्यांना वाचवण्यासाठी मध्ये पडलेल्या परमेश्वर गवारे यांच्यावरही हल्लेखोरांनी मारहाण केली.
हल्ल्यानंतर पीडितांनी चकलांबा पोलीस ठाण्यात धाव घेतली. मात्र, सुरुवातीला पोलिसांकडून तक्रार दाखल करून घेण्यास टाळाटाळ केल्याचा आरोप करण्यात आला आहे. सत्तेतील पक्षाचे (भाजप) नाव जोडून वाळू माफियांकडून हा दहशतवाद सुरू असल्याचे स्थानिकांचे म्हणणे आहे. (Sujat Ambedkar)
दरम्यान, ही बाब वंचित बहुजन आघाडीचे युवा नेते सुजात आंबेडकर यांच्या निदर्शनास आणून दिल्यानंतर त्यांनी तत्काळ दखल घेतली. त्यांच्या सूचनेनुसार पक्षाचे पदाधिकारी पीडितांची भेट घेण्यासाठी गेले व संबंधित पोलीस अधिकाऱ्यांशी चर्चा करून अखेर एफआयआर दाखल करण्यात आला. (Sujat Ambedkar)
या वेळी वंचित बहुजन आघाडीचे राज्य प्रवक्ते प्रशांत बोराडे, जिल्हाध्यक्ष अजय सरवदे यांच्यासह डॉ. दिनेश सुरडकर, अॅड. गौतम साळवे, मिलिंद सरपते, रोहन मगर आणि धम्मा धूळधुळे उपस्थित होते. या घटनेमुळे परिसरात तणावाचे वातावरण निर्माण झाले असून अवैध वाळू तस्करीचा प्रश्न पुन्हा एकदा ऐरणीवर आला आहे.
