नांदेड : नांदेड जिल्ह्यातील पीपल्स कॉलेजमध्ये १८ मार्च २०२६ रोजी आरएसएसकडून आयोजित करण्यात आलेला महिला दिनाचा कार्यक्रम वंचित बहुजन आघाडीच्या आंदोलनामुळे रद्द करण्यात आला. हा कार्यक्रम राष्ट्र सेविका समितीच्या वतीने आयोजित करण्यात आला होता.
मिळालेल्या माहितीनुसार, राष्ट्र सेविका समितीने (राष्ट्रीय महिला स्वयंसेवक समिती) महिला दिनानिमित्त एका विशेष कार्यक्रमाचे आयोजन महाविद्यालयात केले होते. या आयोजनाची माहिती मिळताच वंचित बहुजन आघाडी आणि सम्यक विद्यार्थी आंदोलनाचे कार्यकर्ते तसेच इतर विद्यार्थी मोठ्या संख्येने एकत्र आले. आणि कार्यक्रमाला विरोध दर्शवून हा कार्यक्रम रद्द केला. यामुळे परिसरात काही काळ तणावाचे वातावरण निर्माण झाले. अखेर आयोजकांना कार्यक्रम रद्द करण्याचा निर्णय घ्यावा लागला. (Nanded news)
या आंदोलनात वंचित बहुजन आघाडीचे नगरसेवक कुलदीप राक्षसमारे तसेच सम्यक विद्यार्थी आंदोलनचे नेते आतिश ढगे, रितेश गुळवे, शंतनु डोंगरे, मीना आरसे, प्रफुल कवडकर, विशाल कदम, प्रबुद्ध काळे, साई पाटील यांच्यासह अनेक विद्यार्थी प्रतिनिधी उपस्थित होते. (Nanded news)
यावेळी आंदोलनकर्त्यांनी आपली भूमिका मांडताना RSS सारख्या संघटनांच्या विचारसरणीला विरोध दर्शविला. त्यांनी अशा प्रकारचे कार्यक्रम होऊ देणार नसल्याचे सांगितले. यावेळी ते म्हणाले की, आरएसएससारख्या संघटना देशात विष पेरण्याचे काम करत असून, शैक्षणिक संकुलात अशा विचारधारेचे मनसुबे पूर्ण होऊ देणार नाही. तसेच यावेळी घोषणाबाजी करत निषेध दर्शवला.
