RCB Crowned WPL 2026 Champions: महिला प्रीमियर लीगच्या अंतिम सामन्यात रॉयल चॅलेंजर्स बंगळुरुनं (RCB) दमदार कामगिरी करत दुसऱ्यांदा विजेतेपदावर नाव कोरलं. हा ऐतिहासिक क्रिकेट सामना बडोद्याच्या बीसीए स्टेडियममध्ये रंगला. आरसीबी आणि दिल्ली कॅपिटल्स यांच्यात डब्ल्यूपीएलची फायनल पार पडली. दिल्ली कॅपिटल्सला 6 विकेट्सनी पराभूत करत आरसीबीनं हा सामना आपल्या नावावर केला. अवघ्या 3 चेंडू शिल्लक असतानाच आरसीबीनं 204 धावांचं आव्हान पार केलं.
या ऐतिहासिक विजयाची शिलेदार ठरल्या कर्णधार स्मृती मानधना. तिनं खेळलेली 87 धावांची अप्रतिम खेळी आरसीबीच्या विजयाचा कणा ठरली. स्मृतीने मुंबई इंडियन्सची कर्णधार हरमनप्रीत कौर हीला पछाडत या चौथ्या मोसमात सर्वाधिक धावा करणारी फलंदाज ठरली आहे. तसेच स्मृतीने हरमनप्रीतच्या कॅप्टन म्हणून 2 ट्रॉफी जिंकण्याच्या विक्रमाची बरोबरीही केली.
तिच्यासोबत जॉर्जिया व्हॉल हिनं 79 धावांची झुंजार खेळी करत दिल्लीच्या गोलंदाजांवर दबाव आणला. या दोघींच्या फलंदाजीच्या जोरावर आरसीबीनं चौथ्या पर्वात विजेतेपद पटकावलं.
दिल्लीची मोठी धावसंख्या, पण विजय नाही
टॉस हरल्यानंतर प्रथम फलंदाजी करत दिल्ली कॅपिटल्सनं 20 ओव्हरमध्ये 203 धावांचा डोंगर उभा केला. जेमिमा रॉड्रिग्ज हिनं 57 धावांचं अर्धशतक झळकावत संघाला भक्कम स्थितीत नेलं. तर लिजेल ली हिनं 37 धावा करत आक्रमक सुरुवात केली. शेवटच्या षटकांत वुलफार्टच्या फटकेबाजीमुळं दिल्लीने 200 चा टप्पा ओलांडला. मात्र, एवढी मोठी धावसंख्या असूनही दिल्लीला विजेतेपद गाठता आलं नाही.
डब्ल्यूपीएलची सुरुवात 2023 मध्ये झाली आणि यंदा स्पर्धेचा चौथा हंगाम पार पडला. विशेष म्हणजे दिल्ली कॅपिटल्सनं सलग चार वेळा अंतिम फेरी गाठली, मात्र प्रत्येक वेळी त्यांना पराभवाचं तोंड पाहावं लागलं. यंदाही विजेतेपदाचं स्वप्न अपूर्णच राहिलं.
दुसरीकडे, रॉयल चॅलेंजर्स बंगळुरुनं दुसऱ्यांदा विजेतेपद पटकावून आपली ताकद सिद्ध केली.
