मुंबई – राज्यात पुन्हा एकदा मान्सून सक्रिय होणार असल्याची माहिती वेधशाळेने दिली आहे. दरम्यान 12 ते 16 जून या कालावधीत राज्यात बहुतांश भागात मुसळधार पाऊस पडणार असल्याचेही वेधशाळेने म्हटले आहे. मान्सून पाऊस पुन्हा सक्रिय होणार असून कोकण आणि गोवा येथे 13 ते 15 जून दरम्यान मुसळधार पाऊस पडण्याची शक्यता आहे, अशी माहिती वेधशाळेच्या संचालकांनी दिली आहे.
त्यांनी सांगितले की, मोसमी पावसाच्या मार्गक्रमणासाठी अनुकूल वातावरण निर्मिती होण्याची शक्यता येत्या 3 ते 4 दिवसांत आहे. त्यानुसार मध्य महाराष्ट्रात 12 जून रोजी मराठवाड्यातील काही भागात 12 ते 14 जून दरम्यान पाऊस पडण्याची शक्यता आहे. कोकण, गोवा येथे 12 आणि 15 जून दरम्यान मुसळधार तर 13 ,14 जून रोजी अति मुसळधार पाऊस पडण्याची शक्यता आहे. मध्य महाराष्ट्रात 13 ते 15 जून दरम्यान मुसळधार पाऊस पडण्याची शक्यता आहे.
दरम्यान वेधशाळेच्या संचालकांनी नागरिकांनी सतर्क रहावे असे म्हटले आहे. तसेच सतर्कतेबाबत विविध सुचना देखील केल्या आहेत. 12 ते 16 जून या कालावधीत मच्छिमारांनी समुद्रात मासेमारी करण्यासाठी जाऊ नये. वीजांच्या गडगडाटांसह वादळ होत असताना नागरिकांनी खुल्या मैदानावर काम करु नये, वीजा होताना झाडांच्या खाली आसरा घेऊ नये, वीजेची आणि इलेक्ट्रॉनिक उपकरणे वीज पुरवठा खंडित करुन ठेवावीत, ओढा, तलाव, नदी आदी पाण्याच्या स्त्रोतातून तत्काळ बाहेर पडावे, वीज वहन करणाऱ्या सर्व वस्तूंपासून दूर राहावे, अशा सूचना वेधशाळेच्या संचालकांनी दिल्या आहेत.
