मुंबई : मिठी नदीतील गाळ काढण्यासाठी नेमलेल्या कंत्राटदार व महापालिका अधिकाऱ्यांनी गैरव्यवहार केला असल्याचे सांगितले जात आहे. या प्रकरणी ईडीने काल मुंबई आणि कोची येथील एकूण 15 ठिकाणी छापे टाकले आहेत. मिठी नदीतील गाळ काढण्याच्या प्रकरणात कंत्रादाराने व महापालिका अधिकाऱ्यांनी 65 कोटी रुपयांचा गैरव्यवहार केला असल्याचे सांगितले जात आहे. त्यामुळे ईडीने कारवाईसाठी शुक्रवारी मुंबईसह कोची शहरात छापेमारी केली. यावेळी संबधित कंत्राटदारासह एकूण 15 ठिकाणी छापे टाकण्यात आले..
काल अचानक ईडीने 65 कोटी रुपयांच्या गैरव्यवहारप्रकरणी मुंबई आणि कोची येथे 15 ठिकाणी छापे टाकले. यामध्ये घोटाळ्यातील संबंधित कंत्राटदारासह कंपनीचे मालक, सिनेअभिनेता दिनो मोरिया, त्याचा भाऊ सॅटिनो मोरिया, मध्यस्थाच्या घरासह कार्यालयाचा समावेश आहे. काही महापालिका अधिकारी आणि कंत्राटदारासह इतरांच्या घरावर, कार्यालयावर ईडीने छापेमारी करत कारवाई केली. या कारवाईत काही आक्षेपार्ह दस्तावेज ताब्यात घेण्यात आले आहेत. गाळ काढण्याचे यंत्रसामग्री पुरविणार्या कंपनीपैकी एक मॅटप्रॉप टेक्निकल सर्व्हिसेस प्रायव्हेट लिमिटेड ही कंपनी कोचीतील आहे तर इतर भागीदार मुंबईतील आहेत त्यामुळे ही कारवाई मुंबई आणि कोची या ठिकाणी केली. या संपूर्ण प्रकरणात मोठ्या प्रमाणात मनी लाँड्रिंग झाल्याचे उघडकीस आल्यानंतर ईडीकडून ही कारवाई करण्यात आली आहे. ही कंत्राटदार कंपनी कोची शहरातील होती. याच कंपनीने मनपाला बोगस बिल दिल्याचा आरोप आहे. या कारवाईत काही आक्षेपार्ह कागदपत्रांसह इतर साहित्य जप्त करण्यात आले असून या कागदपत्रांची शहानिशा सुरू आहे.
