बंगळुर – बंगळुरू चेंगराचेंगरीप्रकरणी कर्नाटकचे मुख्यमंत्री सिद्धारमय्या यांनी मोठी कारवाई सुरु केली आहे. यामध्ये त्यांनी बंगळुरू शहराच्या पोलिस आयुक्तांना निलंबित केलं आहे. तसेच अतिरिक्त पोलिस आयुक्त, एसीपी, डीसीपी यांच्यासह स्थानिक पोलिस निरिक्षक यांना निलंबित केलं आहे. तर दुसरीकडे रॉयल चॅलेंजर्स बंगळुरू संघासह या कार्यक्रमाचे व्यवस्थापन करणाऱ्या कंपनीविरोधात गुन्हा दाखल करण्यात आला आहे.
आरसीबीने आयपीएल जिंकल्यानंतर बंगळुरूतील चिन्नास्वामी स्टेडिअमवर एका कार्यक्रमाचे आयोजन करण्यात आले होते. या स्टेडिअमच्या बाहेर मोठी गर्दी जमा झाल्याने बंगळुरची चेंगराचेंगरीची घटना घडली. त्यामध्ये 11 जणांना आपला जीव गमवावा लागला होता. तर यामध्ये 50 हून अधिक लोक जखमी झाले होते. यानंतर आता कर्नाटकचे मुख्यमंत्री सिद्धारमय्या यांनी याप्रकरणी कडक कारवाईला सुरुवात केली आहे.
कर्नाटक सरकारने बंगळुरू चेंगराचेंगरीच्या घटनेची चौकशी करण्यासाठी एक समिती नेमली आहे. कर्नाटक उच्च न्यायालयाचे निवृत्त न्यायाधीश मायकल डी कुन्हा यांच्या अध्यक्षतेखाली ही चौकशी करणार आहे. या समितीला 30 दिवसांच्या आत आपला अहवाल देण्याचे आदेश सिद्धारमय्या सरकारने दिले आहेत. तसेच या घटनेला जे जबाबदार असतील त्या सर्वांना अटक करण्यात येणार असल्याची माहिती मुख्यमंत्री सिद्धारमय्या यांनी दिली आहे.
