छत्तीसगड, बीजापूर: छत्तीसगडमधील बीजापूर जिल्ह्यातील मोहिमेदरम्यान सुरक्षा दलांशी झालेल्या दोन चकमकीत ५ नक्षलवाद्यी ठार झाले आहेत, अशी माहिती पोलिसांनी दिली आहे. गेल्या ३ दिवसांत या इंद्रावती नॅशनल पार्क परिसरात सुरू असलेल्या मोहिमेदरम्यान एकूण ७ नक्षलवाद्यांचा खात्मा झाला असून, यामध्ये नक्षलींचे मोठे नेते सुधाकर आणि भास्कर यांचाही समावेश आहे, असे पोलिस अधिकाऱ्यांनी सांगितले आहे. राज्य पोलिसांचे विशेष कार्यबल, जिल्हा राखीव गट आणि सीआरसीएफच्या विशेष कोब्रा पथकाने ४ जून रोजी ही मोहीम सुरू केली होती.
“छत्तीसगडमधील बीजापूर जिल्ह्यातील इंद्रावती नॅशनल पार्क भागात नक्षलविरोधी मोहिम ४ जूनपासून सुरू आहे. या नक्षलविरोधी मोहिमेदरम्यान, सुरक्षा दलांनी ७ माओवादींचे मृतदेह हस्तगत केले आहेत,” असे पोलीस अधिकाऱ्याने सांगितले. शनिवारी गोळीबारानंतर २ मृतदेह सापडले, तर शुक्रवारी आणि शनिवारी दरम्यान झालेल्या चकमकीनंतर ३ मृतदेह मिळाले, असे त्यांनी सांगितले. यामध्ये माओवादी नेते सुधाकर, तेलंगणा राज्य समिती सदस्य बंदी प्रकाश, दंडकारण्य विशेष झोनल कमिटी सदस्य पप्पा राव आणि इतर सशस्त्र नक्षलवाद्यांच्या उपस्थितीबाबत माहिती मिळाल्यावर ही मोहीम हाती घेण्यात आली होती.
