पुणे : पुणे स्टेशन परिसरातील जय जवान नगर, ढोले पाटील क्षेत्रीय कार्यालया शेजारील उद्यानाचा अधिकृत नामफलक बदलण्यात प्रशासनाने दिरंगाई केल्याच्या निषेधार्थ वंचित बहुजन युवा आघाडीने स्वखर्चाने “क्रांतीज्योती सावित्रीबाई फुले उद्यान” असा नवीन नामफलक लावला.
पुणे कॅन्टोन्मेंट विधानसभा मतदारसंघातील प्रभाग क्रमांक १३ मधील या उद्यानाचे उद्घाटन सन १९९१ मध्ये पुणे महानगरपालिकेच्या वतीने “साध्वी सावित्रीबाई फुले उद्यान” या नावाने करण्यात आले होते. मात्र, भारतातील पहिल्या महिला शिक्षिका, स्त्रीशिक्षणाच्या जनक, स्त्रीमुक्तीच्या अग्रदूत आणि सामाजिक क्रांतीच्या महानायिका क्रांतीज्योती सावित्रीबाई फुले यांना केवळ “साध्वी” या उपाधीत मर्यादित करणे हा त्यांच्या कार्याचा अवमान असल्याची भूमिका वंचित बहुजन आघाडीने घेतली होती. (Krantijyoti Savitribai Phule Park)
या संदर्भात वंचित बहुजन आघाडीने सातत्याने पाठपुरावा, निवेदने आणि आंदोलने केली. त्यानंतर पुणे महानगरपालिकेकडे नाव दुरुस्तीचा प्रस्ताव सादर करण्यात आला. अखेर ३ मार्च २०२६ रोजी महापालिकेच्या नाव समितीने “क्रांतीज्योती सावित्रीबाई फुले उद्यान” हे नाव अधिकृतपणे मंजूर केले.
मात्र, ठराव मंजूर होऊन अनेक महिने उलटूनही ढोले पाटील क्षेत्रीय कार्यालय प्रशासनाने अधिकृत नामफलक बदलण्याची कार्यवाही केली नाही. वारंवार पाठपुरावा करूनही प्रशासनाने दखल न घेतल्याने वंचित बहुजन युवा आघाडीने निषेध नोंदवत स्वखर्चाने नवीन नामफलक उभारला. यावेळी पदाधिकाऱ्यांनी सांगितले की, हा केवळ नामफलक नसून महापुरुष आणि महामातांच्या सन्मानासाठी दिलेल्या संघर्षाचा विजय आहे. सामाजिक न्याय, समता आणि स्वाभिमानाच्या लढ्यात अशा प्रश्नांवर यापुढेही ठाम भूमिका घेतली जाईल. (Krantijyoti Savitribai Phule Park)
या प्रसंगी किशोर रिकिबे (अध्यक्ष, वंचित बहुजन युवा आघाडी, पुणे कॅन्टोन्मेंट विधानसभा), युवा नेते मयुर गायकवाड, आकाश कासले (उपाध्यक्ष), अमर सावंत (महासचिव), शिवा डावरे (पुणे शहर सचिव), कृष्णा मोरे (विधानसभा सचिव), अमोल मेघडमबर (संघटक), विनोद सूर्यवंशी (शाखाध्यक्ष), अज्जू शेख, संतोष बनसोडे, राजू गायकवाड, भगवान सोनवणे, अर्जुन कांबळे तसेच वंचित बहुजन आघाडीचे पदाधिकारी व कार्यकर्ते उपस्थित होते.
