सोलापूर : मोहोळ तालुक्यातील शेटफळ येथील बौद्ध वस्तीमध्ये झालेल्या हल्ल्याचा वंचित बहुजन आघाडी, दक्षिण सोलापूरच्या वतीने तीव्र निषेध करण्यात आला. याप्रकरणी आरोपींवर ॲट्रॉसिटी कायद्यानुसार गुन्हा दाखल करून कठोर कारवाई करावी, अशी मागणी करण्यात आली आहे.
याबाबत वंचित बहुजन आघाडीच्या वतीने ग्रामीण सोलापूरच्या उपपोलीस अधीक्षकांना निवेदन देण्यात आले. शेटफळ येथील मागासवर्गीय बौद्ध वस्तीत काही व्यक्तींनी घरात घुसून वृद्ध महिला-पुरुष तसेच लहान मुलांना जातीवाचक शिवीगाळ करून मारहाण केल्याचा आरोप निवेदनातून करण्यात आला आहे.
तसेच घरातील संसारोपयोगी वस्तू, धान्य, भांडी, कपडे आणि फर्निचरची तोडफोड करण्यात आल्याचे निवेदनात नमूद करण्यात आले आहे. देवाला हार-फुले घालण्याच्या कारणावरून सुमारे ३०० जणांनी बौद्ध वस्तीवर सामूहिक हल्ला करून दहशत निर्माण केल्याचा आरोपही करण्यात आला आहे.
या घटनेची निष्पक्ष चौकशी करून दोषींवर ॲट्रॉसिटी कायदा आणि इतर लागू कायद्यांनुसार गुन्हे दाखल करावेत. तसेच जखमी व बाधित कुटुंबांना शासन नियमानुसार आर्थिक मदत आणि संरक्षण द्यावे, अशी मागणी वंचित बहुजन आघाडीने केली आहे.
