सोलापूर : सोलापूर महानगरपालिकेच्या शाळा व मोक्याच्या सार्वजनिक जागा बीओटी तत्त्वावर देण्याच्या प्रस्तावाला वंचित बहुजन आघाडीने तीव्र विरोध केला आहे. यावेळी कार्यकर्त्यांकडून आंदोलन करण्यात आले. तसेच घोषणा देखील देण्यात आले. “शाळा विकून पाणी नको; विद्यार्थ्यांचे भविष्य वाचवा!” अशी भूमिका घेत वंचित बहुजन आघाडीच्या कार्यकर्त्यांनी आंदोलन केले.
तसेच पाणी पुरवठ्यासाठी निधी उभारायचा असेल तर शाळा, मैदाने व सार्वजनिक मालमत्ता विकण्याऐवजी पर्यायी आर्थिक स्रोतांचा वापर करावा, अशी मागणी करण्यात आली. “मनपाची मालमत्ता विकायचीच असेल तर शाळा नको, तुमचा महापौर बंगला विका!” असा सवालही आंदोलनकर्त्यांनी केला.
यावेळी शाळा व सार्वजनिक जागा विक्री अथवा बीओटीच्या प्रस्तावातून वगळाव्यात, अन्यथा नागरिक, पालक व विद्यार्थ्यांना सोबत घेऊन तीव्र आंदोलन छेडण्याचा इशारा वंचित बहुजन आघाडीने दिला. या आंदोलनात आतिश बनसोडे, महेश जाधव, नरेंद्र शिंदे, सुहास सावंत, विनोद इंगळे, गौतम थापटे, मनोज भालेराव, प्रज्वल प्रसन्न, रोहित लालसरे आदी उपस्थित होते.
