बुलढाणा: मलकापूर तालुक्यात भारिपचे माजी बुलढाणा जिल्हाध्यक्ष तथा ज्येष्ठ कार्यकर्ते दिवंगत नारायणराव जाधव यांचे निधन झाले. नारायण जाधव हे मातंग समाजातील ज्येष्ठ नेते आणि कार्यकर्ते होते. त्यांच्या दुःखद निधनानंतर वंचित बहुजन आघाडीच्या राष्ट्रीय नेत्या प्रा. अंजलीताई आंबेडकर यांनी मलकापूर येथील त्यांच्या निवासस्थानी जाऊन कुटुंबीयांची सांत्वनपर भेट घेतली.
नारायणराव जाधव यांनी १९८४ च्या काळात भारिपचे बुलढाणा जिल्हाध्यक्ष म्हणून दोन वेळा जबाबदारी सांभाळली होती. तसेच पक्षाच्या संघटनात्मक कार्यात त्यांचे योगदान महत्त्वपूर्ण राहिले. त्यांच्या निधनाने पक्षाच्या कार्यकर्त्यांमध्ये हळहळ व्यक्त होत आहे.
प्रा. अंजलीताई आंबेडकर यांच्यासोबत वंचित बहुजन आघाडीचे प्रदेशाध्यक्ष राजेंद्र पातोडे आणि प्रदेश महासचिव प्रा. सोमनाथ साळुंके यांनीही जाधव यांच्या कुटुंबीयांची भेट घेऊन त्यांचे सांत्वन केले.
या सांत्वनपर भेटीवेळी स्थानिक जिल्हा व तालुका पदाधिकारी तसेच वंचित बहुजन आघाडीचे कार्यकर्ते मोठ्या संख्येने उपस्थित होते.
