अकोला : वंचित बहुजन आघाडीच्या महाराष्ट्र प्रदेशाध्यक्षपदी राजेंद्र पातोडे यांची लोकशाही पद्धतीने मतदानातून निवड झाल्याबद्दल मराठा सेवा संघ, संभाजी ब्रिगेड आणि जिजाऊ ब्रिगेडच्या वतीने अकोला येथील मराठा सेवा संघ जिल्हा कार्यालयात त्यांचा हृदय सत्कार करण्यात आला.
शिव शाहु फुले आंबेडकर विचारधारेवर काम करणाऱ्या या चळवळीने प्रचंड मताधिक्याने लोकशाही मार्गाने निवडून आलेल्या राजेंद्र पातोडे यांचा गौरव केला. या सोहळ्याला मराठा सेवा संघाचे जिल्हाध्यक्ष डॉ. राजेंद्र कोरडे, माजी जिल्हाध्यक्ष डॉ. पुरुषोत्तम तायडे, प्रदेश संघटक उत्तमराव माने, प्रदेश सदस्य प्रा. प्रदीप चोरे, जिजाऊ ब्रिगेडच्या अध्यक्षा सीमाताई बोके, जिल्हाध्यक्षा रेणुताई गावंडे यांच्यासह जिल्ह्यातील सर्व पदाधिकारी उपस्थित होते.
मनोगत व्यक्त करताना राजेंद्र पातोडे यांनी सर्व पुरोगामी चळवळींनी एकदिलाने, अठरापगड जाती धर्मांना सोबत घेऊन काम करण्याचे आवाहन केले. छत्रपती शिवाजी महाराजांनी उभारलेल्या स्वराज्याच्या धर्तीवर पुन्हा एकदा तसेच स्वराज्य उभे करण्याचा निर्धार त्यांनी व्यक्त केला. शिव शाहू फुले आंबेडकर विचारांच्या सर्व सामाजिक चळवळींनी हातात हात घालून काम करण्याचे तसेच महाराष्ट्रासह देशाला प्रतिगामी विचारांच्या जोखडातून मुक्त करून पुरोगामी दिशेने नेण्याचे आश्वासन त्यांनी दिले.
कार्यक्रमाचे सूत्रसंचालन मराठा सेवा संघाचे सचिव प्रा. संदीप निर्मळ यांनी केले, तर शिवश्री पंकज जायले यांनी प्रास्ताविकातून सत्कार समारंभाची भूमिका मांडली. या प्रसंगी वंचित बहुजन युवा आघाडीचे जिल्हाध्यक्ष श्रीकांत घोगरे, राजकुमार दामोदर, सचिन शिरोळे यांच्यासह मराठा सेवा संघ, संभाजी ब्रिगेड व जिजाऊ ब्रिगेडचे जिल्ह्यातील सर्व पदाधिकारी मोठ्या संख्येने उपस्थित होते.
