नांदेड : लोहा शहरातील जायकवाडी वसाहत येथे पंचशील ध्वजाचा सन्मान पुन्हा प्रस्थापित करण्यात आला आहे. या ठिकाणी सन १९९२ पासून असलेला पंचशील ध्वज काही समाजकंटकांनी काढून टाकल्याने परिसरात संतापाची लाट उसळली होती. या घटनेच्या निषेधार्थ वंचित बहुजन आघाडीच्या वतीने प्रचंड जनआक्रोश मोर्चा काढण्यात आला होता. मोर्चाद्वारे तहसील कार्यालयावर तीव्र निषेध नोंदवत दोषींवर कारवाईची मागणी करण्यात आली होती.
यानंतर ८ ऑगस्ट रोजी वंचित बहुजन आघाडी आणि सकल बौद्ध समाजाच्या वतीने संबंधित ठिकाणी पंचशील ध्वजाची पुनर्स्थापना करण्यात आली. त्यामुळे परिसरातील नागरिकांमध्ये समाधानाचे वातावरण निर्माण झाले.
दरम्यान, वंचित बहुजन आघाडीचे युवा नेते सुजात आंबेडकर यांनी जायकवाडी वसाहतीतील या ठिकाणी भेट देऊन नागरिकांशी संवाद साधला. पंचशील ध्वजाच्या पुनर्स्थापनेनंतर निर्माण झालेल्या परिस्थितीची त्यांनी माहिती घेतली. पंचशील ध्वजाचा सन्मान आणि सामाजिक सलोखा कायम राखण्यासाठी नागरिकांनी एकजुटीने पुढे येण्याचे आवाहन यावेळी करण्यात आले.
