अकोला : मूर्तिजापूर शहरातील चिखली गेट परिसरात घराचे बांधकाम सुरू असताना उच्चदाबाच्या विद्युत प्रवाहाचा जोरदार शॉक लागून एका युवकाला गंभीर दुखापत झाल्याची घटना घडली. या वेळी वंचित बहुजन आघाडीचे माजी तालुकाध्यक्ष संजय नाईक यांनी प्रसंगावधान दाखवत जखमी युवकाला तातडीने रुग्णालयात दाखल केल्याने त्याचे प्राण वाचविण्यात यश आल्याची माहिती आहे.
मिळालेल्या माहितीनुसार, आकाश आकाराम पेंडोरे (रा. सालतवाडा) हा युवक चिखली गेट परिसरात एका घराच्या बांधकामावर काम करत असताना त्याला उच्चदाबाच्या विद्युत प्रवाहाचा शॉक लागला. शॉकचा तीव्र धक्का बसल्याने तो बेशुद्ध होऊन खाली कोसळला आणि गंभीर जखमी झाला. घटनेनंतर परिसरात एकच खळबळ उडाली. (Electrocution Incident)
Also Read : लेकीच्या मंगल परिणयाचे औचित्य साधत ‘प्रबुद्ध भारत’ पाक्षिकास ५ हजारांचे धम्मदान
घटनेची माहिती मिळताच संजय नाईक यांनी क्षणाचाही विलंब न करता घटनास्थळी धाव घेतली. त्यांनी जखमी युवकाला स्वतःच्या वाहनातून श्रीमती लक्ष्मीबाई देशमुख उपजिल्हा रुग्णालय, मूर्तिजापूर येथे तातडीने दाखल केले. सकाळच्या वेळेतील प्रचंड वाहतूक कोंडी असूनही सतत हॉर्न वाजवत रुग्णवाहिकेप्रमाणे मार्ग काढत त्यांनी युवकाला वेळेत रुग्णालयात पोहोचविले.
रुग्णालयात वैद्यकीय अधीक्षक डॉ. राजेंद्र नेमाडे तसेच डॉ. रेहान चाऊस यांनी तत्काळ उपचार सुरू केले. वेळेत उपचार मिळाल्यामुळे युवकाचे प्राण वाचविण्यात यश आल्याचे वैद्यकीय सूत्रांनी सांगितले. सध्या आकाश पेंडोरे याच्यावर उपजिल्हा रुग्णालयात उपचार सुरू असून त्याची प्रकृती वैद्यकीय देखरेखीखाली आहे. (Electrocution Incident)
Also Read : श्रीगोंद्यात २९ जून रोजी ‘मुशाफिरी यात्रा’ समारोप सोहळा; सुजात आंबेडकर आणि लक्ष्मण गायकवाड यांची प्रमुख उपस्थिती
अत्यंत संकटाच्या क्षणी कोणताही विचार न करता तत्परतेने मदतीसाठी धाव घेत माणुसकीचा आदर्श घालून देणाऱ्या संजय नाईक यांच्या या कार्याचे मूर्तिजापूर शहरासह परिसरातील नागरिकांकडून सर्वत्र कौतुक होत आहे. त्यांच्या या संवेदनशील आणि सामाजिक कृतीमुळे एका युवकाला नवजीवन मिळाल्याची भावना नागरिकांनी व्यक्त केली.
