अकोला : सामाजिक बांधिलकी जपत समाजप्रबोधनाच्या कार्याला हातभार लावण्याचा स्तुत्य आदर्श स्नेहनगर, गुड्डी रोड, अकोला येथील रहिवासी तथा प्रबुद्ध भारत पाक्षिकाचे नियमित वाचक मनोहर काशीरामजी निखाडे यांनी घालून दिला आहे. आपल्या कन्या सेजल यांच्या मंगल परिणयाचे औचित्य साधत त्यांनी प्रबुद्ध भारत पाक्षिकास ५,००० चे धम्मदान केले.
मनोहर निखाडे हे गेल्या अनेक वर्षांपासून प्रबुद्ध भारत पाक्षिकाचे नियमित वाचक आहेत. सामाजिक, वैचारिक आणि प्रबोधनात्मक उपक्रमांमध्ये ते सातत्याने सक्रिय सहभाग नोंदवत असतात. प्रबुद्ध भारतला धम्मदान देण्याचा त्यांनी यापूर्वीच संकल्प केला होता. आपल्या लेकीच्या विवाहासारख्या आनंददायी प्रसंगी तो संकल्प पूर्ण करून त्यांनी समाजापुढे प्रेरणादायी उदाहरण ठेवले आहे.
यावेळी मनोहर निखाडे यांनी सांगितले की, “समाजात वैचारिक प्रबोधन घडविणाऱ्या, बहुजन समाजाला दिशा देणाऱ्या संस्था आणि माध्यमांना आर्थिक पाठबळ देणे ही काळाची गरज आहे. अशा माध्यमांच्या बळकटीकरणासाठी प्रत्येकाने आपल्या परीने योगदान देणे आवश्यक आहे.” डॉ. बाबासाहेब आंबेडकर यांनी सुरू केलेले प्रबुद्ध भारत हे बहुजन समाजाच्या हक्कांचे, सामाजिक परिवर्तनाचे आणि वैचारिक प्रबोधनाचे ऐतिहासिक पाक्षिक आहे. या धम्मदानाबद्दल प्रबुद्ध भारत परिवारातर्फे मनोहरराव काशीरामजी निखाडे तसेच संपूर्ण निखाडे परिवाराचे मनःपूर्वक अभिनंदन करण्यात आले.
