जालना : मंठा तालुक्यातील लिंबे वडगाव येथील पाटोदा साठवण तलाव भूसंपादन प्रकरणातील कथित अनियमितता आणि भूसंपादन अनुदान घोटाळ्याच्या निषेधार्थ वंचित बहुजन आघाडीच्या वतीने जालना जिल्हाधिकारी कार्यालयासमोर जोरदार निदर्शने करण्यात आली. यावेळी आमदार बबनराव लोणीकर यांच्याविरोधात घोषणाबाजी करत दोषींवर तातडीने गुन्हे दाखल करण्याची मागणी करण्यात आली.
आंदोलनकर्त्यांनी दिलेल्या माहितीनुसार, लिंबे वडगाव ग्रामपंचायत आमदार बबनराव लोणीकर यांच्या प्रभावाखाली असल्याने पाटोदा साठवण तलावामुळे बाधित झालेल्या लिंबे वडगाव येथील दलित वस्तीतील मूळ रहिवाशांना राजकीय द्वेषातून, त्यांनी मतदान केले नसल्याच्या कारणावरून, जाणीवपूर्वक भूसंपादन प्रक्रियेतून वगळण्यात आले. तसेच सरपंच, ग्रामसेवक, परतूरचे उपविभागीय अधिकारी पद्माकर गायकवाड आणि कार्यकारी अभियंता यांच्या संगनमताने भूसंपादन अनुदानात घोटाळा झाल्याचा आरोपही करण्यात आला.
या प्रकरणाची सखोल चौकशी करून संबंधित सर्व दोषींवर कठोर कारवाई करण्यात यावी तसेच गुन्हे दाखल करण्यात यावेत, अशी प्रमुख मागणी आंदोलनकर्त्यांनी केली.
या आंदोलनात वंचित बहुजन आघाडीचे मराठवाडा उपाध्यक्ष दीपक डोके, जिल्हा संघटक राजेंद्र खरात, बोरखेडीचे सरपंच मनोहर म्हस्के, ज्येष्ठ नेते एम. व्ही. चौधरी, सतीश डोंबे, दीपक जाधव, बाबासाहेब अवचार, परमेश्वर महाजन, अरुण खनपटे, आनंद जाधव, गौतम जाधव, सचिन भुतेकर, आसाराम होळकर, श्रीरंग खरात, विठ्ठल होळकर, दत्ता देवकाते, लक्ष्मण महाजन, दगडू खनपटे, रामप्रसाद विभुते, रमेश भुतेकर, विकास खनपटे, करण जाधव, विकास होळकर, विठ्ठल बोरकर, प्रभाकर खनपटे यांच्यासह शेकडो महिला, पदाधिकारी आणि कार्यकर्ते मोठ्या संख्येने सहभागी झाले.
