दापोली : भारतरत्न डॉ. बाबासाहेब आंबेडकर यांच्या 135 व्या जयंतीनिमित्त वंचित बहुजन आघाडी, तालुका दापोली यांच्या वतीने पेन्शनर्स हॉल, दापोली येथे जयंती उत्साहात साजरी करण्यात आली. पक्षाचे राष्ट्रीय अध्यक्ष ऍड. बाळासाहेब आंबेडकर यांच्या मार्गदर्शनानुसार आयोजित या कार्यक्रमात बाबासाहेबांच्या प्रतिमेला पुष्पहार अर्पण करून अभिवादन करण्यात आले.
यावेळी जयंतीचे औचित्य साधत विविध सामाजिक व राजकीय क्षेत्रात कार्यरत मान्यवरांचा वंचित बहुजन आघाडीत पक्ष प्रवेश करण्यात आला. नव्याने पक्षात दाखल झालेल्यांमध्ये बबन मोहिते (वळणे), सुरज सकपाळ (मौजे दापोली), वाहिद दाऊद ऐनरकर (मुरूड), पंकज मोरे (भोपण), संदीप जाधव (हर्णे), प्रतिक अशोक जाधव व मनश्री प्रतिक जाधव (तेरे वायंगणी), दिशांत दिनेश कदम व उत्कर्ष उद्देश कवडे (अडखळ), दिवाकर शिवराम जाधव (जालगाव), गणेश अशोक जाधव (वणौशी) तसेच नितीन उत्तम सकपाळ (मौजे दापोली) यांचा समावेश आहे. पक्षाच्या वतीने सर्व नव्या सदस्यांचे स्वागत करण्यात आले.
कार्यक्रमानंतर कार्यकर्त्यांनी उपजिल्हा रुग्णालय, दापोली येथे भेट देऊन रुग्णांना फळ वाटप केले. तसेच रुग्णालयातील रुग्णांच्या अडचणी व गैरसोयी जाणून घेत त्यांच्या समस्या समजून घेण्याचा प्रयत्न करण्यात आला. या उपक्रमामुळे सामाजिक बांधिलकी जपत जयंती साजरी केल्याचे चित्र दापोलीत पाहायला मिळाले.
