औरंगाबाद : पडेगाव येथील कचरा डेपोला लागलेल्या आगीमुळे परिसरात प्रदूषण पसरले आहे. नागरिकांच्या आरोग्याला धोका निर्माण झाल्यामुळे कचरा डेपो तात्काळ हटवावा, अशी मागणी करीत वंचित बहुजन आघाडीने आंदोलन केले. यावेळी संतप्त झालेल्या कार्यकर्त्यांनी कचरा डेपोच्या गेटला कुलूप ठोकले.
वंचित बहुजन आघाडीच्या वतीने शहर उपाध्यक्ष मेघानंद जाधव आणि पश्चिमचे शहराध्यक्ष ॲड. पंकज बनसोडे यांच्या नेतृत्वाखाली भीमनगर, भावसिंगपुरा, पडेगाव रोडवरील ग्लोरिया सिटी परिसरात कचरा डेपोसमोर (डंपिंग ग्राउंड) मंगळवारी सकाळी आंदोलन करण्यात आले. (Padegaon Garbage Depot)
Also Read : ज्येष्ठ आंबेडकरी कार्यकर्ते उत्तम शंकरराव आचार्य यांचे निधन; वंचित बहुजन आघाडीकडून श्रद्धांजली
दोन महिन्यासांपासून डंपिंग ग्राउंडला लागलेल्या आगीमुळे परिसरात मोठ्या प्रमाणावर विषारी धूर पसरला आहे. या धुरामुळे लहान मुले, ज्येष्ठ नागरिक, महिला आणि रुग्णांना श्वसनाचा त्रास, दम्याचे झटके, डोळ्यांची जळजळ आणि विविध आरोग्य समस्या निर्माण झाल्या आहेत. त्यामुळे कचरा डेपो हटवावा, अशी मागणी वंचितच्या वतीने करण्यात आली. ‘कचरा डेपो हटवा, नागरिकांचे आरोग्य वाचवा’ अशा घोषणाही देण्यात आल्या.
तसेच, मनपा घनकचरा विभागाचे नंदकिशोर भोंबे यांना तात्काळ घटनास्थळी बोलवावे आणि हा प्रश्न कायमस्वरूपी निकाली काढावा अशी मागणी कार्यकर्त्यांनी केली. महानगर पालिकेचे वरिष्ठ अधिकारी कोणीही आले नाही. त्यामुळे संतप्त झालेल्या कार्यकर्त्यांनी कचरा डेपोच्या गेटला आणि घंटागाडीच्या वाहन तळाला कुलूप ठोकून आपला संताप व्यक्त केला. (Padegaon Garbage Depot)
Also Read : ‘M FILES’ मुळे ‘तो माणूस’ अमेरिकेच्या तालावर नाचत आहे ; ॲड. प्रकाश आंबेडकरांचा कोणावर निशाणा ?
पडेगाव येथील कचरा डेपो बंद केला नाही, तर यापेक्षा मोठे आंदोलन उभे करण्यात येईल असा इशारा मेघानंद जाधव आणि पंकज बनसोडे यांनी दिला. यावेळी पश्चिमचे शहराध्यक्ष ॲड. पंकज बनसोडे, महिला जिल्हाध्यक्ष कोमल हिवराळे, भा. वि. गवई, प्रवीण जाधव, गोकुळ भुजबळ, सतीश म्हस्के, कडूबा तुपे, अर्जुन मगरे, विमलबाई जाधव, पंचशीला बचके, सोनू नितनवरे, वैभव नितनवरे आदी उपस्थित होते.
