जालना : जाफ्राबाद तालुक्यातील गाढे गव्हाण येथे कथित गावगुंडांविरोधात कारवाई होत नसल्याच्या निषेधार्थ वंचित बहुजन आघाडीच्या वतीने शुक्रवार, दि. 29 मे 2026 रोजी जालना येथील पोलीस अधीक्षक (एसपी) कार्यालयासमोर धरणे व निदर्शने आंदोलन करण्यात आले. हे आंदोलन वंचित बहुजन आघाडीचे मराठवाडा उपाध्यक्ष दीपक डोके यांच्या नेतृत्वाखाली पार पडले.
आंदोलनादरम्यान देण्यात आलेल्या निवेदनात गाढे गव्हाण येथील काही जातीयवादी प्रवृत्तीच्या व्यक्तींनी दोन समाजांमध्ये तेढ निर्माण करण्याचे प्रयत्न केल्याचा आरोप करण्यात आला. तसेच संबंधित व्यक्तींना राजकीय पाठबळ मिळत असल्याने त्यांच्यावर कारवाई होत नसल्याचेही निवेदनात नमूद करण्यात आले.
या संदर्भात टेंभुर्णी येथील सहाय्यक पोलीस निरीक्षक कैलास भारती तसेच भोकरदनचे उपविभागीय पोलीस अधिकारी (डीवायएसपी) यांच्याकडे मागील अनेक महिन्यांपासून वारंवार लेखी तक्रारी देण्यात आल्याचे आंदोलनकर्त्यांनी सांगितले. मात्र, अद्याप कोणतीही ठोस कारवाई झालेली नसल्याचे सांगण्यात आले.
वंचित बहुजन आघाडीच्या वतीने जालना येथील अतिरिक्त पोलीस अधीक्षक विक्रम साळी यांना निवेदन देऊन संपूर्ण प्रकरणाची निष्पक्ष चौकशी करून दोषींवर कठोर कारवाई करण्याची मागणी करण्यात आली. तसेच आंबेडकरी कार्यकर्त्यांवर खोटे गुन्हे दाखल करण्याच्या धमक्या दिल्याचा आरोप असलेल्या पीएसआय बाबासाहेब खार्डे यांच्या भूमिकेची चौकशी करून योग्य ती कारवाई करावी, अशीही मागणी निवेदनाद्वारे करण्यात आली.
यावेळी वंचित बहुजन आघाडीचे मराठवाडा उपाध्यक्ष दीपक डोके, सम्यक विद्यार्थी आंदोलनाचे जिल्हाध्यक्ष सूरज सोनवणे, तालुकाध्यक्ष भानुदास साळवे, विजय सावंत, सुनिता सावंत, विलास सावंत, लंका सावंत, बबन सावंत, ज्ञानेश्वर हिवाळे, छाया हिवाळे, राजू सावंत, विद्या सावंत, राहुल सावंत, संगीता सावंत, सदाशिव सावंत, शीला सावंत, भगवान घोरपडे, सुभद्रा घोरपडे, विष्णू सावंत, राजू दाभाडे, विजय दाभाडे, गंभीर सावंत, अनिल हिवाळे, नितीन हिवाळे, राधिका हिवाळे, भगवान दाभाडे, रमेश हिवाळे, योगेश हिवाळे, वंदना सावंत, मंदा हिवाळे, लताबाई सावंत, आनंद हिवाळे, समाधान हिवाळे, प्रल्हाद हिवाळे यांच्यासह पदाधिकारी व कार्यकर्ते मोठ्या संख्येने उपस्थित होते.
आंदोलनादरम्यान संबंधित प्रकरणातील दोषींवर तातडीने कारवाई करण्याची मागणी करण्यात आली असून, न्याय न मिळाल्यास पुढील काळात तीव्र आंदोलन छेडण्याचा इशाराही वंचित बहुजन आघाडीच्या पदाधिकाऱ्यांनी दिला.
