मुंबई : मुंबई येथील छत्रपती शिवाजी महाराज पार्क येथे दिनांक २५ नोव्हेंबर रोजी वंचित बहुजन आघाडीच्या वतीने संविधान सन्मान सभा आयोजित करण्यात आली आहे. या सभेला काँग्रेस चे नेते राहुल गांधी यांना आम्ही निमंत्रण पाठवणार असल्याचे वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी माध्यमांशी बोलताना सांगितले.
ही सभा संविधानाच्या सन्मानार्थ आहे राजकीय नाही. आम्ही राजकीय कार्यक्रमासाठी परवानगी मागितली नाही हे महाराष्ट्र शासनाला कळवले होते. दोन दिवसांपूर्वी मुख्यमंत्री कार्यालयाने परवानगी दिल्याचे कळवले. त्याची प्रत महानगरपालिकेकडून आम्हाला मिळाली आहे. आम्ही कार्यक्रमाच्या प्रचाराला लागलो आहोत. २५ तारखेची सभा यशस्वी करण्यासाठी वंचित बहुजन आघाडीचे कार्यकर्ते सुद्धा कामाला लागले आहेत. असेही ॲड. आंबेडकरांनी सांगितले.
या कार्यक्रमाचे ॲड. प्रकाश आंबेडकरांनी दिलेले निमंत्रण राहुल गांधी स्वीकारणार का ? याकडे संपूर्ण राज्याचे लक्ष लागले आहे.
