इराण युध्दात ट्रम्प तात्या पुन्हा एकदा “चिकन आऊट” होतील काय ?

– संजीव चांदोरकर

मागच्या जानेवारीत राष्ट्राध्यक्ष पदाची शपथ घेतल्यानंतर डोनाल्ड ट्रम्प यांनी आधी जाहीर केलेल्या अनेक निर्णयात बदल केले किंवा चक्क मागे घेतले. व्यापार युद्ध, आयात कर लादणे, चीनला धडा शिकवणे, ग्रीनलँड ताब्यात घेणे इत्यादी. त्यामुळे तेथे TACO…म्हणजे Trump Always Chickens Out…. असा नवीन शब्दच तयार झाला.

इराण विरुद्ध एकतर्फी छेडलेल्या युध्दात ट्रम्प पुन्हा चिकन आऊट होतील का याबद्दल अमेरिकेत चर्चा सुरू झाली आहे. ट्रम्प देखील तसे संकेत देऊ लागले आहेत.

खरेतर ट्रम्प किंवा कोणत्याही राष्ट्राध्यक्षाला वेसण घालण्याची घटनादत्त जबाबदारी अमेरिकन काँग्रेसची. पण तीच चिकन आऊट झाली आहे असे दिसते.

पण ट्रम्प यांना वेसण घालण्याचे काम अमेरिकेतील आणि विकसित देशांतील फायनान्शियाल मार्केट करणार असे दिसते.

खनिज तेल…वर खाली होत आहे. १२५ डॉलर्स प्रती बॅरल, १५० डॉलर्स…अनेक अंदाज व्यक्त होत आहेत. अमेरिकेत गॅसोलिन किंमती १७ टक्क्यांनी वाढले आहे.

Dow Jones पाच टक्क्यांनी खाली आला आहे

अमेरिकेन रोख्यांचे भाव वाढून yield कमी होत आहे. तीच स्थिती इतर विकसित देशात आहे. अमेरिकेसह कोणत्याच देशाची केंद्रीय बँक नजीकच्या काळात व्याजदर कमी करू शकणार नाही असा कयास आहे.

युद्धाचे उद्दिष्ट सांगताना ट्रम्प म्हणतात इराण मधील रेजिम चेंज करायची आहे. रेजिम चेंज होऊन अधिक कडवी रेजिम आली तर काय ? याबद्दल ते नेहमीप्रमाणे चूप बसणार आहेत

नोव्हेंबर मध्ये अमेरिकेत मध्यावधी निवडणुका आहेत. तेथे राष्ट्राध्यक्ष नाही चेंज झाले तरी संसदेतील रेजिम चेंज होऊ शकते

ही पोस्ट फक्त डोनाल्ड ट्रम्प यांच्यावर टीका करण्यासाठी नाही.

सत्ताकारण, देशातील निवडणुका, कोण सत्तेवर येणार, आंतरराष्ट्रीय व्यापार नीती, परराष्ट्र नीती, भू राजनैतिक सबंध…. हे सारे किती गंभीर विषय आहेत हे अधोरेखीत करण्यासाठी आहे. गंभीर अशासाठी की ते कोट्यावधी नागरिकांच्या आणि पुढील पिढ्यांच्या जीवन मरणाचे भवितव्य ठरवत असतात. जे जिवंत रहातील त्यांच्या दैनंदिन आयुष्याची गुणवत्ता आणि विपन्नावस्था ठरवतात. राजकारण, सत्ताकारण याबद्दल घृणा तयार झाली असली तर त्यावर मात केली पाहिजे.