– संजीव चांदोरकर
वरून पडणारे चाकू किंवा तलवारी पकडण्याचा प्रयत्न करू नये…. शेअर बाजारातील शहाणपण !
सेन्सेक्स आणि शेयर मार्केट…. मध्यपूर्वेतील परिस्थिती मुळे, नर्व्हसनेस मुळे अजून खाली जात आहे. कोणी ग्रेट ज्योतिषी देखील नक्की काय होईल ते सांगू शकतं नाही.
आज आता लिहिताना सेन्सेक्स ११५० अंकांनी खाली…७२,४३० आहे.
५२ आठवड्याचा नीचांक ७१,४२५ होता. त्याच्या फक्त एक हजार अंकाने दूर. त्याच्या जवळपास सरकत आहे.
फायनान्शियाल सल्लागार/ ब्रोकर्स अनेक सल्ले देतील. टेक्निकल ऍनॅलिसिस सांगतील. मार्केट बॉटमला आहे. यानंतर ते वरच जाणार आहे. अनेक शेअर्सचे अतिशय आकर्षक बाजारभाव आहेत. तुम्ही तर चडफडत होतात तो शेयर विकत घेण्यासाठी. हा तर ५२ आठवड्याच्या निचांकाच्या जवळ आहे.
सगळ्यांचे ऐका. पण निर्णय घेण्याआधी मनाचे ऐका.
आपण किती नुकसान सहन करू शकतो याचा कागदावर हिशोब करा.
समजा मार्केट उलटे फिरले आणि तुम्ही खालच्या बाजारभावाची बस मिस केली. कोणी मरत नाही. बसेस सतत येत असतात. काही काळाने जास्त भावात शेयर खरेदी केलात तर काय होईल? कमी भांडवली नफा होईल. एवढेच.
नफा/ रिटर्न आणि जोखीम/ रिस्क…या दोन्हीवर एकाचवेळी दोन्ही डोळ्यांची बुबुळे लावून ठेवा. यात एकाचवेळी हा शब्द महत्वाचा. नजर हटी, दुर्घटना घटी.
दिसेल त्याला सारख्या सारख्या टिप्स विचारू नका. संबंधितांकडून कोणत्या टिप्स मार्केटमध्ये फिरतील हे बघितले जाते. साधे नाही ते प्रकरण. त्यांना विकायचे असतात. म्हणून त्यांना खरेदी करणारे हवे असतात.
शेयर बाजारात गुंतवलेले मुद्दल देखील कधीकधी जाऊ शकते. मान्य. पण मुद्दल कमीतकमी उडून जाईल अशी किमान सजग स्ट्रॅटेजी तरी हवी.
काही काळ कॅश घेऊन बसलात तर काही सेबी शिक्षा करत नाही. कॅशवर शांतपणे बसायला शिकले पाहिजे. कॅश सारखी आपल्याला ढुशी मारत राहते “मला बसून कंटाळा आलाय. मला एकदाचा गुंतव” त्याला बळी पडू नका.
दुसरी स्ट्रॅटेजी. एकाच टोपलीत सर्व अंडी ठेवू नका. शेयर कितीही आकर्षक वाटला तरी गुंतवणुक जास्त कंपन्यांच्या शेयर मध्ये करा. जोखीम विखरून टाका.
हे सल्लागार, ब्रोकर पहाटेपासून स्क्रीनवर खिळून असतात. तुम्ही नोकरी, धंदा, व्यवसाय सांभाळून गुंतवणूक करता. हा मूलभूत फरक लक्षात ठेवा.
जास्तीत जास्त नफा कमावण्याची स्पर्धा कोणाशीही खेळू नका.
आपल्या कष्टाने, घामाने कमावलेल्या बचती…सर्वात मूल्यवान असतात. स्वतःच्या मुलांची काळजी घ्याल तेवढी स्वतःच्या बचतींची काळजी घ्या..
