Commonwealth Games : सध्या सुरू असलेल्या राष्ट्रकुल क्रीडा स्पर्धेत भारतासाठी अनेक प्रेरणादायी कामगिरी समोर येत आहेत. त्यापैकी सर्वाधिक चर्चेत असलेलं नाव म्हणजे पॅरा-ॲथलेटिक्सपटू शर्मिला धनखड. महिलांच्या F57 गोळाफेक (Shot Put) प्रकारात 9.81 मीटरचा हंगामातील सर्वोत्तम थ्रो नोंदवत त्यांनी सुवर्णपदक जिंकत भारताला पॅरा-ॲथलेटिक्समधील पहिले सुवर्ण मिळवून दिले. ४० वर्षीय शर्मिलाने ९.८१ मीटर गोळा फेकत हंगामातील सर्वोत्तम (Season Best) कामगिरीसह भारताची २० वर्षांची पॅरा अॅथलेटिक्समध्ये पदकांची प्रतीक्षा संपवली.
याच स्पर्धेत भारताच्या शिल्पा शायला हिने ७.२६ मीटर अंतरावर वैयक्तिक सर्वोत्तम (Personal Best) फेक नोंदवून कांस्यपदकाची कमाई केली. सुरुवातीला शिल्पा चौथ्या स्थानावर होती, परंतु नाट्यमय घडामोडींनंतर तिसऱ्या क्रमांकावर असलेल्या नायजेरियाच्या युकारिया इयाझी हिची एकमेव वैध फेक फाऊल ठरवण्यात आली. या निर्णयामुळे शिल्पाला थेट कांस्यपदक मिळाले अन् एकाच पॅरा ॲथलेटिक्स स्पर्धेत भारताच्या खात्यात दोन पदकांची ऐतिहासिक नोंद झाली.
कोण आहे शर्मिला धनखड?
शर्मिला धनखड यांचा जन्म 15 ऑगस्ट 1986 रोजी हरियाणातील रेवाडी येथे झाला. मात्र त्यांचे बालपण अत्यंत कठीण परिस्थितीत गेले. अवघ्या दोन वर्षांच्या असताना त्यांना पोलिओची लागण झाली आणि त्यानंतर आयुष्यभर अपंगत्वाशी झुंज द्यावी लागली. घरची आर्थिक परिस्थिती बिकट होती. आई दृष्टिहीन असल्याने कुटुंबावर अनेक संकटे होती, तर वडिलांच्या कमाईवरच घराचा गाडा चालत होता.
अवघ्या 18 व्या वर्षी त्यांचे लग्न झाले. मात्र लग्नानंतर हुंड्यासाठी छळ, कौटुंबिक हिंसाचार आणि मारहाण यांचा सामना करावा लागला. अखेर वयाच्या 26 व्या वर्षी पहिल्या पतीने त्यांना दोन मुलींसह घराबाहेर काढले. या कठीण काळात त्यांनी लोकांच्या घरी आया म्हणून काम केले, मुलांची देखभाल करून कुटुंबाचा उदरनिर्वाह केला आणि पुन्हा नव्याने उभे राहण्याचा निर्धार केला.
वयाच्या 28 व्या वर्षी त्यांनी अजित सिंग यांच्याशी पुनर्विवाह केला. दुसऱ्या पतीचा मिळालेला भक्कम पाठिंबा त्यांच्या आयुष्यातील मोठा टर्निंग पॉइंट ठरला. त्यांच्या प्रोत्साहनामुळे शर्मिला पॅरा-ॲथलेटिक्सकडे वळल्या. राव तुलाराम स्टेडियममध्ये माजी आंतरराष्ट्रीय खेळाडू टेकचंद यांच्या मार्गदर्शनाखाली त्यांनी प्रशिक्षण सुरू केले. गोळाफेकीच्या पहिल्याच सरावात त्यांनी 5 मीटरचा थ्रो केला. त्यावेळी राष्ट्रीय विक्रम 6 मीटरचा होता. तेथून सुरू झालेला त्यांचा प्रवास आज राष्ट्रकुल स्पर्धेतील सुवर्णपदकापर्यंत पोहोचला.
सुवर्णपदक जिंकल्यानंतर शर्मिला धनखड भावूक झाल्या. त्या म्हणाल्या, “हे पदक मी माझ्या आईला समर्पित करते. तिने आयुष्यभर खूप संघर्ष केला. माझ्या क्षमतेवर ज्यांनी शंका घेतली, त्यांना हेच माझे उत्तर आहे.” त्यांनी आपल्या दिवंगत वडिलांची आठवण काढत सांगितले की, “एशियन गेम्सपूर्वी वडिलांचे निधन झाले. हा विजय त्यांनाही समर्पित आहे.”
