सलगरे :१५ ऑगस्ट रोजी पार पडलेल्या विशेष ग्रामसभेत सलगरे ग्रामपंचायतीने एक महत्त्वपूर्ण ठराव मंजूर केला आहे. वंचित बहुजन आघाडीचे राष्ट्रीय अध्यक्ष आदरणीय प्रकाश उर्फ बाळासाहेब आंबेडकर यांच्या अभिनंदनाचा ठराव संमत करणारी ही महाराष्ट्र राज्यातील एकमेव ग्रामपंचायत ठरली आहे.
या ग्रामसभेत बॅलेट पेपरद्वारे पार पडलेल्या लोकशाही प्रक्रियेतून निवडून आलेले वंचित बहुजन आघाडीचे नवनिर्वाचित प्रदेशाध्यक्ष राजेंद्र पातोडे तसेच सर्व १२ नवनिर्वाचित कार्यकारिणी सदस्यांचे विशेष कौतुक व अभिनंदन करण्यात आले. ग्रामसभेतील सर्व सदस्यांनी व ग्रामस्थांनी एकमुखाने हा अभिनंदनाचा ठराव मंजूर करून नवनिर्वाचित पदाधिकाऱ्यांना पुढील वाटचालीसाठी हार्दिक शुभेच्छा दिल्या.
या ऐतिहासिक ठरावामुळे सलगरे ग्रामपंचायतीचे संपूर्ण सांगली जिल्ह्यासह राजकीय व सामाजिक वर्तुळात विशेष कौतुक होत आहे.
