पुणे : पुणे विद्यापीठात शुक्रवारी (दि. १९) नीट पेपरफुटी विरोधात वंचित बहुजन आघाडी प्रणित सम्यक विद्यार्थी आंदोलनाच्यावतीने आंदोलन करण्यात आले. सम्यक विद्यार्थी आंदोलनाचे प्रदेश प्रवक्ते प्रशांत बोराडे यांनी केंद्रीय शिक्षणमंत्री धर्मेंद्र प्रधान यांचा राजीनामा व NEET ची जबाबदारी NTA कडून काढून UPSC कडे देण्यात यावी या मागण्यांसह केंद्र सरकारच्या धोरणांवर जोरदार टिका केली.
तसेच सम्यक विद्यार्थी आंदोलनच्या विद्यार्थी नेत्यांनी मोदी सरकार व शिक्षणमंत्री धर्मेंद्र प्रधान यांनी शिक्षणाचा बाजार मांडल्याची सडकून टीका केली. तसेच भाजपच्या निवेदिता एकबोटेंच्या पुण्यातील माॅडर्न महाविद्यालयातच नीट पेपर फुटी व प्रेम बिर्हाडे सारखे गंभीर प्रकरण कसे काय घडते? असा गंभीर प्रश्न करत निवेदिता एकबोटे, शिक्षिका मनीषा मांढरे व माॅडर्न महाविद्यालयाच्या भ्रष्टाचारी व जातीयवादी प्रशासनावर गंभीर टिका केली.
वंचित बहुजन आघाडीचे पुणे शहराध्यक्ष ॲड.अरविंद तायडे यांनी नीट पेपरफुटीने आत्महत्या केलेल्या १४ विद्यार्थ्यांचा जीव घेतला असून यामुळे शिक्षणमंत्री धर्मेंद्र प्रधान यांच्यावर सदोष मनुष्यवधाचा व आत्महत्येस प्रवृत्त केल्याचा गुन्हा दाखल करण्याची गंभीर मागणी केली.
तसेच सम्यक विद्यार्थी आंदोलनाचे पुणे शहर महासचिव अभिषेक कांबळे यांनी NEET ची जबाबदारी NTA कडून काढून UPSC कडे द्यावी आणि NEET पेपरफुटीमुळे ग्रस्त २३ लाख विद्यार्थ्यांच्या हितासाठी Public Examination (Prevention of Unfair Means Act 2024) ची अंमलबजावणी करावी.तसेच नीट पेपरफुटीच्या पीडीत विद्यार्थ्यांना न्याय मिळवून देण्यासाठी वंचित बहुजन आघाडी व सम्यक विद्यार्थी आंदोलन पीडीत विद्यार्थ्यांच्या पाठीशी खंबीरपणे उभे असल्याचे आश्वासन दिले.
यावेळी सम्यक विद्यार्थी आंदोलनाच्या संघर्षा संखद यांनी शिक्षणमंत्री धर्मेंद्र प्रधान व NTA च्या भ्रष्टाचारी कारभारावर सडकून टीका केली. या आंदोलनात मोठ्या संख्येने विद्यार्थ्यांचा सहभाग होता. केंद्रीय शिक्षणमंत्री धर्मेंद्र प्रधान यांच्या राजीनाम्याची जोरदार मागणी यावेळी करण्यात आली.
