नाशिक: नाशिक जिल्ह्याच्या राजकारणात काल मोठी घडामोड पाहायला मिळाली. रिपब्लिकन पार्टी ऑफ इंडिया (आठवले गट) चे युवक जिल्हाध्यक्ष आणि दयावान फाउंडेशनचे संस्थापक अध्यक्ष दिनेश जाधव यांनी आपल्या असंख्य समर्थकांसह बुधवारी (दि. ११) वंचित बहुजन आघाडीत जाहीर प्रवेश केला.
मुंबई येथील ‘राजगृह’ या निवासस्थानी वंचित बहुजन आघाडीचे राष्ट्रीय अध्यक्ष ॲड. प्रकाश तथा बाळासाहेब आंबेडकर यांच्या प्रमुख उपस्थितीत हा सोहळा पार पडला.
यावेळी केवळ रिपाई कार्यकर्त्यांनीच नव्हे, तर गुजराती समाजाचे रोनक ठक्कर यांनी देखील वंचित बहुजन आघाडीत पक्ष प्रवेश केला. दिनेश जाधव यांच्यासोबत नाशिक जिल्ह्यातील त्यांच्या कार्यकर्त्यांचा मोठा संच वंचितमध्ये सामील झाल्याने नाशिकमध्ये पक्षाची ताकद अधिक वाढली आहे.
यावेळी बाळासाहेब आंबेडकर यांनी नवीन सदस्यांचे पक्षात स्वागत केले. याप्रसंगी वंचित बहुजन आघाडीचे नाशिक जिल्हाध्यक्ष चेतन गांगुर्डे व पक्षाचे इतर पदाधिकारी व कार्यकर्ते मोठ्या संख्येने उपस्थित होते.
