Digital Payments : डिजिटल पेमेंट क्षेत्रातील प्रमुख कंपनी पेटीएमला मोठा धक्का बसला असून भारतीय रिझर्व्ह बँकेने (RBI) पेटीएम पेमेंट्स बँकेचा बँकिंग परवाना रद्द केला आहे. वारंवार नियामक नियमांचे उल्लंघन आणि परवान्याच्या अटींचे पालन न केल्यामुळे आरबीआयने ही कठोर कारवाई केल्याचे सांगितले आहे.
या निर्णयामुळे पेटीएम पेमेंट्स बँक भविष्यात बँकिंगसंबंधित सेवा देऊ शकणार नाही. त्यामुळे ग्राहकांना नवीन ठेवी जमा करणे, बचत खाते वापरणे, मुदत ठेवी (FD) आणि वॉलेट सेवांमध्ये अडचणी येऊ शकतात. विशेषतः पेटीएम बँकेशी जोडलेल्या वॉलेट आणि फास्टॅग वापरकर्त्यांवर याचा थेट परिणाम होण्याची शक्यता आहे. (Digital Payments)
मात्र, पेटीएम अॅपद्वारे UPI पेमेंट पूर्णपणे बंद होणार नाही, असे स्पष्ट करण्यात आले आहे. कारण QR कोड स्कॅन करून केलेले व्यवहार थेट ग्राहकाच्या लिंक केलेल्या बँक खात्यातून होत असल्याने त्यावर तातडीचा परिणाम होणार नाही. त्यामुळे दुकानदार, छोटे व्यापारी आणि ग्राहकांचे दैनंदिन UPI व्यवहार सुरू राहू शकतात.
तरीही पेटीएम बँक वापरणाऱ्या लहान दुकानदारांना आणि रस्त्यावरील विक्रेत्यांना सेटलमेंट आणि व्यवहार प्रक्रियेत काही अडचणींचा सामना करावा लागू शकतो. विशेषतः ज्यांचे व्यवहार पेटीएम पेमेंट्स बँकेवर अधिक अवलंबून आहेत, त्यांना पर्यायी व्यवस्था करावी लागू शकते. (Digital Payments)
आरबीआयच्या या निर्णयामागे ग्राहकांचे पैसे सुरक्षित ठेवण्याचा उद्देश असल्याचे मानले जात आहे. या कारवाईमुळे इतर वित्तीय संस्थांनाही नियमांचे काटेकोर पालन करण्याचा संदेश गेला आहे. भविष्यात संभाव्य बँकिंग गैरव्यवहार टाळण्यासाठीही हा निर्णय महत्त्वाचा मानला जातो. ग्राहकांनी घाबरण्याचे कारण नसून, खात्यातील शिल्लक रक्कम काढण्यासाठी किंवा दुसऱ्या बँकेत हस्तांतरित करण्यासाठी नियामक काही कालावधी आणि पर्याय उपलब्ध करून देऊ शकतो.
