परळी : तालुक्यातील जिरेवाडी येथे आरक्षणाचे जनक, लोककल्याणकारी राजे राजर्षी छत्रपती शाहू महाराज यांची जयंती अत्यंत उत्साहात साजरी करण्यात आली. या जयंतीचे औचित्य साधून वंचित बहुजन आघाडीचे युवक कार्यकर्ते देवानंद गायकवाड यांच्या वतीने विद्यार्थ्यांना मोफत शालेय साहित्याचे वाटप करण्यात आले. कार्यक्रमाच्या सुरुवातीला उपस्थित मान्यवरांच्या हस्ते राजर्षी शाहू महाराज यांच्या प्रतिमेचे पूजन करून त्यांना अभिवादन करण्यात आले.
या कार्यक्रमाला प्रमुख पाहुणे म्हणून वंचित बहुजन आघाडीचे जिल्हा महासचिव मिलिंद घाडगे, वंचितचे युवा तालुकाध्यक्ष राजेश सरवदे आणि तालुका उपाध्यक्ष रवी मुंडे आदी मान्यवर उपस्थित होते. शैक्षणिक वर्षाच्या सुरुवातीलाच वंचितचे युवक नेते देवानंद गायकवाड यांच्याकडून गरजू विद्यार्थ्यांना मोफत शालेय साहित्य वाटप करण्यात आल्यामुळे विद्यार्थी आणि पालकांमध्ये आनंदाचे वातावरण पाहायला मिळाले.
सामाजिक बांधिलकी जपत हा उपक्रम राबवल्याबद्दल गायकवाड यांचे परिसरात कौतुक होत आहे. हा कार्यक्रम यशस्वी पार पाडण्यासाठी कोंडीबा रोडे, जिजाऊ करण रोडे, रुक्मिणी जोंधळे, शशिकांत रोडे आणि विवेकानंद गायकवाड यांच्यासह इतर कार्यकर्त्यांनी मोलाचे परिश्रम घेतले. या कार्यक्रमाला जिरेवाडी परिसरातील नागरिक आणि विद्यार्थी मोठ्या संख्येने उपस्थित होते.
