राहुरी : राहुरी पोटनिवडणुकीत वंचित बहुजन आघाडीचे उमेदवार संतोष एकनाथ चोळके यांच्या प्रचारार्थ आयोजित जाहीर सभेत पक्षाचे नेते किसन चव्हाण यांनी प्रस्थापितांवर जोरदार टीका करत इशारा दिला.
“अहमदनगर जिल्हा हा साखरसम्राटांचा आणि प्रस्थापितांचा जिल्हा आहे. अशा परिस्थितीत गरीब मराठा समाजातील संतोष चोळके यांना उमेदवार म्हणून उभे केले आहे,” असे ते म्हणाले.
तसेच, “वंचित बहुजन आघाडीला मतदान करू नये म्हणून लोणी परिसरातील एक नेते गोरगरिबांना घर पाडण्याच्या धमक्या देत आहेत. काचेच्या घरात राहणाऱ्यांनी इतरांच्या घरांवर दगड मारू नयेत,” असा इशाराही त्यांनी दिला.
भटके विमुक्त, आदिवासी, पीडित व शोषित समाजाच्या हक्कांसाठी वंचित बहुजन आघाडी लढत असल्याचे सांगत, “आता तुमची जबाबदारी आहे की मताच्या माध्यमातून सामान्य माणसाला निवडून द्या,” असे आवाहन त्यांनी उपस्थितांना केले.
या सभेला मोठ्या संख्येने कार्यकर्ते व नागरिक उपस्थित होते.
