पुणे : पुणे आणि पिंपरी-चिंचवड शहरात विषारी स्पिरिटयुक्त गावठी दारूमुळे मृत्यूंचा आकडा १३ वर पोहोचल्याने एकच खळबळ उडाली आहे. अनेकांची प्रकृती गंभीर असून विविध रुग्णालयांत त्यांच्यावर उपचार सुरू आहेत. या धक्कादायक घटनेमुळे संपूर्ण परिसरात भीती आणि संतापाचे वातावरण निर्माण झाले आहे.
पिंपरी-चिंचवडमधील दापोडी आणि फुगेवाडी परिसरात आठ जणांचा मृत्यू झाला असून पुण्यातील काळेपडळ भागात तीन तर हडपसर परिसरात दोन जणांचा मृत्यू झाल्याची माहिती समोर आली आहे. विषारी दारू प्यायल्यानंतर अनेकांना तोंडाला फेस येणे, उलट्या होणे आणि अचानक प्रकृती खालावल्याची लक्षणे दिसून आली. काही जणांचा उपचारादरम्यान मृत्यू झाला.
Also Read : NEET-UG 2026 प्रश्नपत्रिका फुटी प्रकरण, शिक्षणातील भ्रष्टाचार व व्यापारीकरणाविरोधात निवेदन
या प्रकरणातील मुख्य आरोपी योगेश वानखेडे हा सराईत अवैध दारू विक्रेता असल्याची माहिती समोर आली आहे. त्याच्यावर यापूर्वीही अनेक गुन्हे दाखल असून पोलिसांनी त्याला अटक केली आहे. त्याने तयार केलेली स्पिरिटयुक्त विषारी दारू पुणे आणि पिंपरी-चिंचवडच्या विविध भागांत विक्रीसाठी पुरवल्याचा आरोप आहे.
गेल्या ४८ तासांत मृत्यू झालेल्यांमध्ये फुगेवाडी परिसरातील अक्षय अवसरमल, सौरभप्पा भंगारी आणि भीमाप्पा बसवंत पुजारी यांचा समावेश आहे. त्यांच्यावर वायसीएम आणि मेडीपॉईंट रुग्णालयात उपचार सुरू असताना मृत्यू झाला.
Also Read : फीफा वर्ल्ड कप २०२६: कव्हरेजसाठी भारताकडून एकमेव महिला फोटो जर्नलिस्ट गीतिका तालुकदार यांची निवड
स्थानिक नागरिकांकडून विषारी दारूमुळे मृत्यू झाल्याचा आरोप होत असताना पिंपरी-चिंचवड पोलिसांनी मात्र या प्रकरणाबाबत वेगळा दावा केल्याने संभ्रमाचे वातावरण निर्माण झाले आहे. त्यामुळे मृत्यूचे नेमके कारण काय, याबाबत प्रशासनाच्या अधिकृत अहवालाकडे सर्वांचे लक्ष लागले आहे.
या घटनेनंतर अवैध दारू विक्रीविरोधात कठोर कारवाई करण्याची मागणी जोर धरू लागली असून नागरिकांमध्ये प्रशासनाविरोधात तीव्र नाराजी व्यक्त होत आहे.
