पुणे : पुण्यातील आंबेगाव येथे एक धक्कादायक घटना घडली आहे. एका ३१ वर्षीय महिलेने आपल्या ६ वर्षाच्या मुलासह बिल्डिंगच्या टेरेसवरून उडी मारून आत्महत्या केली. यात महिलेचा आणि चिमुरड्याचा जागीच मृत्यू झाला. नंदेच्या त्रासाला कंटाळून तिने टोकाचे पाऊल उचलले अशी माहिती समोर आली.
मयुरी शशिकांत देशमुख (वय ३१, दळवी नगर, आंबेगाव) आणि विष्णु शशिकांत देशमुख (वय ६) असे मृत्युमुखी पडलेल्या दोघांची नावे आहेत. बुधवारी सायंकाळी सहा वाजण्याच्या सुमारास आंबेगाव पोलीस स्टेशनच्या हद्दीत ही घटना घडली.
घटनेची चौकशी करत असताना पोलिसांना लिपस्टिकने लिहिलेली एक चिठ्ठी सापडली. ज्यामध्ये महिलेने आत्महत्या केल्याचे कारण नमूद केलेले आहे. नंदेच्या त्रासाला कंटाळून मी हा निर्णय घेत आहे असे चिठ्ठीत लिहिलेले होते. पोलिसांनी ही चिठ्ठी ताब्यात घेतली असून, तिच्या नातेवाईकांना याची माहिती दिली आहे. याप्रकरणी रात्री उशिरापर्यंत गुन्हा दाखल करण्याची प्रक्रिया सुरू होती.
पोलिसांनी दिलेल्या माहितीनुसार, मूळच्या बुलढाणा जिल्ह्यातील खामगाव येथील रहिवाशी असलेल्या मयुरी पती आणि सहा वर्षे मुलासोबत आंबेगाव बुद्रुक येथे भाड्याच्या घरात राहत होत्या. दोन दिवसांपूर्वी त्या पतीसह खामगाव येथे गेल्या होत्या. मात्र तिथे गेल्यानंतर सासरच्या लोकांसोबत त्यांचे भांडण झाले. आणि त्यानंतर मुलाला घेऊन त्या एकट्याच पुण्यात परतल्या होत्या. दरम्यान आज सायंकाळच्या सुमारास त्यांनी राहत असलेल्या इमारतीच्या टेरेसवरून मुलासह खाली उडी मारली. यामध्ये त्यांचा जागीच मृत्यू झाला.
