राफेलच्या ‘चाव्या’ आता अमेरिकेच्या हातात
मुंबई : पंतप्रधान नरेंद्र मोदी यांनी राफेल विमान खरेदीच्या माध्यमातून भारताचे राष्ट्रीय संरक्षण आणि सार्वभौमत्व अमेरिकेच्या दावणीला बांधल्याचा गंभीर आरोप वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी केला आहे. राफेल विमानांसाठी महत्त्वाचे सुटे भाग पुरवणाऱ्या फ्रेंच कंपनीची मालकी आता अमेरिकन कंपनीकडे गेल्याने भारताची सुरक्षा धोक्यात आल्याचे त्यांनी म्हटले आहे.
ॲड. प्रकाश आंबेडकर यांनी सोशल मीडियाद्वारे या तांत्रिक बदलाकडे लक्ष वेधले आहे. ते म्हणाले की, डिसेंबर २०२५ मध्ये, अमेरिकन कंपनी ‘लोअर ग्रुप’ (Loar Group) ने ‘एलएमबी एरोस्पेस’ (LMB Aerospace) या फ्रेंच कंपनीची खरेदी केली. ‘एलएमबी’ ही कंपनी राफेल विमानांच्या इलेक्ट्रॉनिक्स आणि रडारसाठी अत्यंत आवश्यक असलेले ‘स्पेशलाइज्ड हाय-परफॉर्मन्स कूलिंग विंग्स’ आणि ‘इलेक्ट्रिक मोटर्स’ तयार करते. याला राफेलची ‘अंतर्गत जीवन-रक्षक प्रणाली’ मानले जाते. (Prakash ambedkar)
राफेलचे सर्वात मोठे वैशिष्ट्य म्हणजे ते ITAR-free (अमेरिकन नियंत्रणापासून मुक्त) असल्याचे सांगितले जात होते. मात्र, आता कंपनीची मालकी अमेरिकेकडे गेल्याने हे सुटे भाग ‘युनायटेड स्टेट्स मुनिशन्स लिस्ट’ (USML) च्या कक्षेत येऊ शकतात.
भारताच्या सार्वभौमत्वाला धोका ―
ॲड. प्रकाश आंबेडकर यांनी या व्यवहारावर प्रश्नचिन्ह उपस्थित करताना म्हटले आहे की, आता या मिशन-क्रिटिकल भागांच्या पुरवठ्यावर आणि दुरुस्तीवर अमेरिकन सरकारचे थेट नियंत्रण असेल. भारताने कोणाला सुटे भाग विकावेत किंवा कोणाकडून खरेदी करावेत, यामध्ये आता अमेरिकेचा हस्तक्षेप वाढणार आहे. (Prakash ambedkar)
आजवर आपले सुरक्षा विषयक निर्णय स्वतः घेणाऱ्या भारतासाठी, आपल्या फायटर जेट्सच्या चाव्या दुसऱ्या देशाच्या हातात असणे हा राष्ट्रीय सुरक्षेसाठी मोठा धोका आहे, असे ॲड. प्रकाश आंबेडकर यांनी नमूद केले.
पुढे ते पंतप्रधान मोदींवर थेट निशाणा साधताना विचारले की, मोदी राफेल खरेदीचा हट्ट का धरत आहेत? रशियन बनावटीचे Su-57E का खरेदी केले जात नाही? मोदींनी स्वतःला आणि देशाचे सार्वभौमत्व अमेरिकेला विकला आहे असे ते म्हणाले.
