मुंबई : सातारा जिल्ह्यातील फलटण उपजिल्हा रुग्णालयातील वैद्यकीय अधिकारी डॉ. राजेंद्र रुपनवर यांचा मुंबईतील रुग्णालयात उपचारादरम्यान मृत्यू झाला. रुग्णालयातील अंतर्गत वाद आणि तडकाफडकी झालेल्या बदलीच्या त्रासाला कंटाळून त्यांनी हे टोकाचे पाऊल उचलल्याचा आरोप केला जात असून, या घटनेमुळे संपूर्ण वैद्यकीय क्षेत्रात तीव्र संताप आणि खळबळ उडाली आहे.
डॉ. रुपनवर यांनी २७ ऑगस्ट रोजी हातावर अंतिम संदेश आणि त्रासाला जबाबदार असणाऱ्यांची नावे लिहून आत्महत्या करण्याचा पहिला प्रयत्न केला होता. त्यानंतर दोन दिवसांपूर्वी त्यांनी मुंबईतील सायन परिसरात एका इमारतीवरून उडी मारली. गंभीर जखमी अवस्थेत त्यांच्यावर उपचार सुरू असतानाच त्यांची प्राणज्योत मालवली.
या दुर्दैवी प्रकरणाची गंभीर दखल घेत फलटण उपजिल्हा रुग्णालयाचे उपाधीक्षक डॉ. लीला मदने यांना तडकाफडकी निलंबित करण्यात आले आहे. दरम्यान, न्याय मिळेपर्यंत मृतदेह ताब्यात घेणार नसल्याची भूमिका डॉ. रुपनवर यांच्या कुटुंबीयांनी घेतली असून, मुंबईतील ‘मार्ड’ संघटनेच्या डॉक्टरांनीही आंदोलनाचा पवित्रा घेतला आहे.
