परभणी : शक्तीपीठ महामार्गावरून परभणी जिल्ह्यात गेल्या अनेक महिन्यांपासून धुमसणारा असंतोष आज उफाळून आला. आज सहजपूर जवळा येथे प्रशासनाकडून महामार्गाची मोजणी सुरू असताना शेतकरी आणि प्रशासन आमनेसामने आले. या दरम्यान एका संतप्त शेतकऱ्याने स्वतःवर पेट्रोल ओतून आत्मदहनाचा प्रयत्न केल्याने खळबळ माजली. सुदैवाने, पोलिसांनी वेळीच हस्तक्षेप केल्यामुळे पुढील अनर्थ टळला असून संबंधित शेतकऱ्याला ताब्यात घेण्यात आले आहे.
नेमकी घटना काय?
आज सकाळपासून सहजपूर जवळा परिसरात प्रशासकीय पथकाने पोलीस बंदोबस्तात मोजणी सुरू केली होती. प्रशासनाने मोजणीची भूमिका घेतल्याने शेतकरी आक्रमक झाले. आंदोलक शेतकरी आणि पोलीस यांच्यात मोठी वादावादी झाली. आमच्या जमिनी जाऊ देणार नाही, अशा घोषणा देत शेतकऱ्यांनी काम रोखण्याचा प्रयत्न केला. परिस्थिती हाताबाहेर जात असल्याचे पाहून पोलिसांनी आंदोलक शेतकऱ्यांना ताब्यात घेतले आहे. (Parbhani Farmers Clash)
शक्तिपीठ महामार्गाच्या घोषणेपासूनच जिल्ह्यातील शेतकरी विरोधाच्या भूमिकेत आहेत. प्रस्तावित रस्ता शेतीपासून सुमारे 20 फूट उंच असणार आहे, ज्यामुळे शेतात येण्या-जाण्यास आणि पाण्याचा निचरा होण्यास मोठी अडचण निर्माण होईल. तसेच अनेक अल्पभूधारकांची संपूर्ण शेती या मार्गाखाली जाणार असल्याने ते भूमिहीन आणि ‘देशोधडीला’ लागण्याची भीती व्यक्त होत आहे.
प्रशासनाने काल रात्री उशिरा (सुमारे 12 ते 1 च्या दरम्यान) घरांवर नोटिसा चिकटवल्याचा आरोप शेतकऱ्यांनी केला असून, हा प्रकार अन्यायकारक असल्याचे त्यांनी म्हटले आहे. परभणी जिल्ह्यातून हा महामार्ग साधारण 71 किलोमीटर जाणार आहे. यामुळे अनेक गावे आणि शेकडो शेतकरी बाधित होणार आहेत.
