Anti Corruption Bureau : नवी मुंबई महानगरपालिका मुख्यालयात सोमवारी लाचलुचपत प्रतिबंधक विभागाने (ACB) मोठी कारवाई करत अतिक्रमण उपायुक्त डॉ. कैलास गायकवाड यांना 42 हजार रुपयांची लाच स्वीकारताना रंगेहात पकडले. या कारवाईमुळे महापालिका प्रशासनात एकच खळबळ उडाली असून उपायुक्त दर्जाच्या अधिकाऱ्यावर झालेली ही पहिलीच थेट कारवाई मानली जात आहे. (Anti Corruption Bureau)
मिळालेल्या माहितीनुसार, अतिक्रमण हटविण्याच्या कामासाठी नियुक्त कंत्राटदाराचे प्रलंबित देयक मंजूर करण्यासाठी डॉ. गायकवाड यांनी लाचेची मागणी केली होती.
ऐरोली परिसरात 15 नोव्हेंबर 2024 ते 15 फेब्रुवारी 2025 या कालावधीत करण्यात आलेल्या अतिक्रमण हटविण्याच्या कामाचे सुमारे दीड कोटी रुपयांचे बिल थकीत होते. त्यापैकी 21 लाख रुपयांचे बिल मंजूर करून देण्यासाठी गायकवाड यांनी दोन टक्के रक्कम लाच म्हणून मागितल्याचा आरोप आहे. (Anti Corruption Bureau)
कंत्राटदाराने याबाबत लाचलुचपत विभागाकडे तक्रार दाखल केली. तक्रारीची पडताळणी केल्यानंतर ACB ने महापालिका मुख्यालयात सापळा रचला. गायकवाड यांच्या केबिनमध्येच ही कारवाई करण्यात आली आणि 42 हजार रुपयांची लाच स्वीकारताना त्यांना पकडण्यात आले.
विशेष म्हणजे, अतिक्रमण विभागाची जबाबदारी स्वीकारल्यानंतर डॉ. गायकवाड यांनी शहरात मोठ्या प्रमाणात अतिक्रमणविरोधी मोहीम सुरू केली होती. या मोहिमेसाठी साहित्य व कामगार कंत्राटी पद्धतीने नियुक्त करण्यात आले होते. मात्र आता त्याच कामाच्या बिल प्रक्रियेत लाच मागितल्याच्या आरोपामुळे त्यांच्या कार्यपद्धतीवर प्रश्नचिन्ह निर्माण झाले आहे. (Anti Corruption Bureau)
या प्रकरणानंतर डॉ. गायकवाड यांच्या आर्थिक व्यवहारांचीही चौकशी केली जाणार असल्याची माहिती मिळत आहे. या घटनेमुळे नवी मुंबई महापालिका प्रशासनातील पारदर्शकतेवर पुन्हा एकदा प्रश्न उपस्थित झाले.
