नांदेड : नांदेड जिल्ह्यातील खासगी नर्सिंग महाविद्यालयांकडून आदिवासी विद्यार्थ्यांकडून अतिरिक्त शुल्क आकारले जात असल्याचा आरोप करत, संबंधित महाविद्यालयांची तातडीने चौकशी करून दोषींवर कठोर कारवाई करावी, अशी मागणी सम्यक विद्यार्थी आंदोलनाच्या वतीने करण्यात आली आहे.
महाराष्ट्र राज्य आदिवासी विकास समितीचे माननीय सचिव नांदेड दौऱ्यावर आले असता, सम्यक विद्यार्थी आंदोलनाचे नांदेड जिल्हा उपाध्यक्ष आतिश ढगे आणि वंचित बहुजन आघाडीचे नगरसेवक कुलदीप राक्षसमारे यांनी त्यांची भेट घेऊन याबाबत निवेदन साद केले.
आदिवासी विद्यार्थ्यांना शासनाच्या नियमानुसार मिळणाऱ्या शैक्षणिक व शुल्क सवलतींचा योग्य लाभ मिळत आहे की नाही, याची तातडीने चौकशी करण्यात यावी, अशी मागणी निवेदनाद्वारे करण्यात आली. तसेच खासगी नर्सिंग महाविद्यालयांकडून शासनाच्या नियमांचे उल्लंघन करून अतिरिक्त शुल्क वसूल केले जात असल्याचे आढळल्यास, संबंधित महाविद्यालयांची सखोल चौकशी करून दोषी संस्थांवर प्रशासकीय तसेच कायदेशीर कारवाई करावी, अशी मागणी करण्यात आली. याशिवाय विद्यार्थ्यांकडून बेकायदेशीररीत्या वसूल करण्यात आलेले अतिरिक्त शुल्क त्यांना परत मिळवून द्यावे, अशीही मागणी करण्यात आली आहे.
आदिवासी समाजातील अनेक विद्यार्थी आर्थिक अडचणींचा सामना करत उच्च शिक्षण घेण्यासाठी प्रयत्नशील आहेत. अशा परिस्थितीत त्यांच्याकडून नियमबाह्य पद्धतीने अतिरिक्त शुल्क आकारणे हा विद्यार्थ्यांवर अन्याय करणारा प्रकार असल्याचे आंदोलनाच्या वतीने नमूद करण्यात आले.
या संपूर्ण प्रकरणाची निष्पक्ष आणि सखोल चौकशी करून आदिवासी विद्यार्थ्यांना शासनाच्या योजनांचा व शुल्क सवलतींचा पूर्ण लाभ मिळवून द्यावा आणि संबंधित विद्यार्थ्यांना न्याय द्यावा, अशी मागणी सम्यक विद्यार्थी आंदोलन, नांदेड जिल्ह्याच्या वतीने करण्यात आली आहे.
