Bribery Case : नागपूरातून भ्रष्टाचाराच्या विरोधातील मोठी कारवाई समोर आली असून जिल्हाधिकारी कार्यालयातील एका वरिष्ठ अधिकाऱ्याला लाच स्वीकारताना लाचलुचपत प्रतिबंधक विभागाने (ACB) रंगेहात पकडले आहे. नरेश साधूरावजी बर्वे (वय ५४), असे अटक करण्यात आलेल्या अधिकाऱ्याचे नाव असून ते महसूल सहाय्यक म्हणून कार्यरत आहेत.
मिळालेल्या माहितीनुसार, शिवाजीनगर-महाल परिसरातील नझुल प्लॉटवरील बांधकामासंदर्भातील अपील अतिरिक्त जिल्हाधिकारी कार्यालयात प्रलंबित होते. हे प्रकरण तक्रारदाराच्या बाजूने निकाली काढण्यासाठी बर्वे यांनी तब्बल ५ लाख रुपयांची मागणी केल्याचा आरोप आहे. (Bribery Case)
तक्रारदाराने याबाबत ACBकडे धाव घेतल्यानंतर १७ आणि २० एप्रिल रोजी पडताळणी करण्यात आली. त्यात लाचेची मागणी होत असल्याचे स्पष्ट झाल्यानंतर ACBने सापळा रचला. शुक्रवारी रात्री नंदनवन परिसरात पंचासमक्ष तक्रारदाराने आरोपीला ५ लाखांची रक्कम दिली. ही रक्कम स्वीकारताच दबा धरून बसलेल्या ACB पथकाने बर्वे यांना तात्काळ ताब्यात घेतले. कारवाईदरम्यान आरोपीकडून ५ लाखांची रक्कम जप्त करण्यात आली. या रकमेत काही बनावट नोटांचाही समावेश असल्याची प्राथमिक माहिती समोर आली असून या मुद्द्यावरही तपास सुरू आहे. (Bribery Case)
या कारवाईनंतर नागपूर जिल्हाधिकारी कार्यालयात एकच खळबळ उडाली आहे. आरोपीविरोधात नंदनवन पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू असून पोलीस निरीक्षक विवेक पडघान यांच्या मार्गदर्शनाखाली पुढील तपास सुरू आहे. दरम्यान, या प्रकरणात आणखी काही अधिकारी किंवा मध्यस्थ सहभागी होते का, याचाही तपास ACBकडून केला जात असल्याची माहिती आहे.
