अकोला : केंद्रात सत्तेत बसलेल्या मोदी सरकारने दहा वर्षात फक्त टिंगल टवाळी केली आणि मोठ्या प्रमाणात ईडी आणि सीबीआय या यंत्रणेचा गैरवापर केला असा आरोप वंचित बहुजन आघाडीचे राष्ट्रीय अध्यक्ष ॲड.प्रकाश आंबेडकर यांनी अकोला येथील पत्रकार परिषदेत केला.
मोदींच्या कार्यकाळात लोकशाहीऐवजी पोलिसीराज्य अस्तित्वात असल्याची दिसत आहे. यंत्रणेचा गैरवापर करून अनेकांना वेटीस धरण्याचे काम या सरकारने केले.विशेष म्हणजे गेल्या दहा वर्षात ईडी आणि सीबीआयने कारवाही केलेल्या एका ही आरोपीला शिक्षा झाली नाही. याचा अर्थ केवळ भीती दाखवण्यासाठी मोदी सरकारने लोकशाहीच्या विरोधात जाऊन सत्तेचा गैरवापर केला असे सिद्ध होत असल्याचेही त्यांनी यावेळी सांगितले.
ॲड.आंबेडकर म्हणाले की, राम मंदिराच्या उद्घाटनासाठी शंकराचार्यांनी तूर्तास विरोध केला होता. मात्र निवडणुका तोंडावर असल्यामुळे शुभ मुहूर्त न पाहता त्यांनी घाई घाईने मंदिराची उद्घाटन करून टाकले तसेच 400 पार चा नारा देऊन त्यांना संविधान बदलायचे आहे हे स्पष्ट दिसते.नवीन वर्ग आणि सवर्ण जो भाजपाकडे वळला होता या मतदारांचा भ्रमनिराश झाल्यामुळे त्यांनी मतदान प्रक्रियेत भाग घेतला आणि त्यामुळे पहिल्या टप्प्यात मतदानाची टक्केवारी प्रचंड घसरली. मोदी सरकारच्या विरोधातील राग व्यक्त करण्यासाठी मतदारांनी सरकारच्या विरोधात मतदान करून आपला हक्क बजावून सरकारचा निषेध करावा. शाहू, फुले, आंबेडकर तसेच मानवतावाद स्वीकारणाऱ्या मतदार वर्गावर आता एक जबाबदारी आली असल्याचेही त्यांनी म्हटले आहे.
लोकशाहीच्या नावाखाली जो धिंगाणा मोदींच्या काळात सुरू आहे त्याला कसे थांबवता येईल यासाठी मतदारांनी जागरूक राहून मतदान करावे. या या सर्व प्रक्रियेसाठी वंचित बहुजन आघाडी हा एकमेव पर्याय असून मतदारांनी निर्भीडपणे वंचित बहुजन आघाडीचा मतदान करावे अशी आवाहनही त्यांनी केले.
यावेळी पत्रकार परिषदेला वंचित बहुजन आघाडीचे युवा नेते सुजात आंबेडकर, अकोला लोकसभा मिडीया समीती प्रमुख ॲड.नरेंद्र बेलसरे, सह जिल्हा प्रसिध्दी प्रमुख विकास सदाशिव उपस्थित होते.
