मुंबई: मुंबईच्या उपनगरातील गोरेगाव परिसरात एका ४५ मजली इमारतीला आग लागल्याची धक्कादायक घटना घडली आहे. ही घटना सकाळी 9.11 वाजता अग्निशमन दलाला माहिती मिळाल्यानंतर 9.25 वाजता आगीला लेव्हल-1 घोषित करण्यात आले. इमारतीच्या नवव्या मजल्यावर लागलेल्या या आगीमुळे परिसरात धुराचे लोट पसरले असून रहिवाशांमध्ये मोठी घबराट निर्माण झाली होती. सुदैवाने, या घटनेत कोणतीही जीवितहानी झाल्याचे वृत्त नाही. (Mumbai building fire)
नेमकी घटना काय?
मिळालेल्या माहितीनुसार, गोरेगावमधील या गगनचुंबी इमारतीच्या ९ व्या मजल्यावर अचानक आग भडकली. काही वेळातच आगीने रौद्र रूप धारण केल्याने धुराचे लोट इमारतीच्या वरच्या मजल्यांपर्यंत पोहोचले. आग लागल्याचे समजताच इमारतीमधील अग्निशमन यंत्रणा (Fire Alarm) सक्रिय झाली आणि रहिवाशांनी सुरक्षित स्थळी धाव घेण्यास सुरुवात केली. (Mumbai building fire)
घटनेची माहिती मिळताच अग्निशमन दलाच्या गाड्या तातडीने घटनास्थळी दाखल झाल्या. जवानांनी तातडीने पाण्याचा मारा करत आग विझवण्याचे काम सुरू केले. अनेकांनी जिन्यांचा वापर करून इमारतीबाहेर धाव घेतली, तर अडकलेल्या काही लोकांना अग्निशमन दलाने सुरक्षितपणे बाहेर काढले.
आगीचे कारण अद्याप स्पष्ट झालेले नाही. मात्र, प्राथमिक अंदाजानुसार शॉर्ट सर्किटमुळे ही आग लागली असावी, अशी शक्यता वर्तवण्यात येत आहे.
