पैठण : कल्याण येथील बुद्धभूमी फाउंडेशनवर ३० मे २०२६ रोजी कल्याण-डोंबिवली महानगरपालिकेच्या अधिकाऱ्यांनी केलेल्या कारवाईदरम्यान भगवान बुद्धांच्या मूर्ती व बौद्ध स्तूपाची तोडफोड केल्याने पैठण शहरात तीव्र निषेध आंदोलन करण्यात आले. भारतीय बौद्ध महासभा तसेच विविध सामाजिक व राजकीय संघटनांच्या वतीने बसस्थानक चौकात सरकारविरोधी घोषणा देत निषेध नोंदविण्यात आला.
यानंतर आंदोलनकर्त्यांनी पैठण तहसील कार्यालयावर मोर्चा काढून नायब तहसीलदार कांबळे यांच्यामार्फत मुख्यमंत्री कार्यालयाला निवेदन सादर केले. निवेदनाद्वारे संबंधित घटनेची सखोल चौकशी करून दोषींवर कारवाई करण्याची मागणी करण्यात आली.
निवेदनात करण्यात आलेल्या प्रमुख मागण्या पुढीलप्रमाणे आहेत –
1. ३० मे रोजी झालेल्या कारवाईदरम्यान घडलेल्या कथित बेकायदेशीर कृत्याची एसआयटीमार्फत चौकशी करून जबाबदार अधिकाऱ्यांवर कठोर कारवाई करावी.
2. संबंधित ठिकाणी विपश्यना केंद्र, शैक्षणिक संकुल तसेच समाजोपयोगी रुग्णालय उभारण्यात यावे.
3. बुद्धभूमी फाउंडेशनच्या मागणीनुसार संरक्षण भिंत व पोहोच रस्ता (Approach Road) तातडीने बांधण्यात यावा.
या आंदोलनात भारतीय बौद्ध महासभेचे जिल्हा संघटक भारत आठवले, वंचित बहुजन आघाडीचे तालुकाध्यक्ष सतीश बोरुडे, तालुकाध्यक्ष सोमनाथ निकाळजे, उपाध्यक्ष शाहीर सुरेश सदावर्ते, रिपाइंचे जिल्हा उपाध्यक्ष राम मिसाळ, सुनील अडसूळ, भीमराव गायकवाड, डॉ. बाबासाहेब आंबेडकर जयंती उत्सव समितीचे अध्यक्ष किरण घाटविसावे, शहर महासचिव दत्ता पा. वाहुळे, ज्ञानदेव आडसूळ, दीपक गायकवाड, दिलीप ससाणे, सुरेश केसापुरे, सुरेश बळीद, लहू शेळके, खंडागळे यांच्यासह मोठ्या संख्येने नागरिक उपस्थित होते. आंदोलनकर्त्यांनी बुद्धभूमी फाउंडेशनवरील कारवाईचा तीव्र निषेध व्यक्त करत न्याय्य चौकशी व विकासकामांच्या मागण्या तातडीने पूर्ण करण्याची मागणी शासनाकडे केली.
