अकोला : मलकापूर–शिवणी, प्रभाग क्रमांक १४ परिसरातील नागरिकांच्या सुरक्षिततेच्या दृष्टीने मलकापूर येथे स्वतंत्र पोलीस चौकी स्थापन करावी, तसेच परिसरातील महत्त्वाच्या आणि संवेदनशील ठिकाणी सीसीटीव्ही कॅमेरे बसवावेत, अशी मागणी नगरसेविका जयश्री महेंद्र बहादूरकर यांनी केली आहे.
यासंदर्भात जयश्री बहादूरकर यांनी (दि.१६) अकोला जिल्ह्याचे पोलीस अधीक्षक अर्चित चांडक यांची भेट घेऊन निवेदन सादर केले. मलकापूर–शिवणी परिसर शहराच्या सीमेवर असून या भागाजवळून रेल्वे मार्ग तसेच महामार्ग जात असल्याने सुरक्षेच्या दृष्टीने येथे कायमस्वरूपी पोलीस सुविधा उपलब्ध असणे आवश्यक असल्याचे निवेदनात नमूद करण्यात आले आहे.
परिसरात घरफोडी, चोरी तसेच इतर अनुचित घटनांबाबत नागरिकांमध्ये चिंता निर्माण होत असल्याने संभाव्य गुन्हेगारी घटनांना आळा घालण्यासाठी तातडीने प्रतिबंधात्मक उपाययोजना करण्याची मागणी करण्यात आली.
मलकापूर येथे स्वतंत्र पोलीस चौकी स्थापन करण्याची मागणी करण्यात आली असून, आपत्कालीन परिस्थितीत किंवा गुन्हेगारी घटना घडल्यास नागरिकांना तातडीने पोलीस मदत मिळावी, हा यामागील उद्देश असल्याचे निवेदनात स्पष्ट करण्यात आले आहे.
तसेच प्रमुख प्रवेश व निर्गमन मार्ग, महामार्गाकडे जाणारे रस्ते, रेल्वे मार्गालगतचा परिसर आणि इतर संवेदनशील ठिकाणी सीसीटीव्ही कॅमेरे बसविण्याची मागणी करण्यात आली आहे. सीसीटीव्ही यंत्रणेमुळे गुन्हेगारी घटनांना प्रतिबंध करण्यास तसेच घटना घडल्यानंतर संबंधित व्यक्तींची ओळख पटविण्यास मदत होऊ शकते, असे निवेदनात नमूद करण्यात आले आहे.
