मालेगाव : मालेगाव महानगरपालिकेच्या गटार व झाडू कामगारांचा २८ दिवसांचा रखडलेला पगार तातडीने देण्यात यावा, या मागणीसाठी वंचित बहुजन आघाडीच्या वतीने आज महापालिकेचे अतिरिक्त आयुक्त रोहिदास दोरगुळकर यांना निवेदन देण्यात आले.
निवेदनात नमूद करण्यात आले की, महापालिकेने गटार व झाडू कामासाठी दिग्विजय इंटरप्राइजेस या ठेकेदाराला कंत्राट दिले होते. संबंधित ठेकेदाराची मुदत संपुष्टात आली असली, तरी कामगारांना त्यांच्या २८ दिवसांच्या श्रमाचे वेतन अद्याप मिळालेले नाही. त्यामुळे कामगारांवर आर्थिक संकट ओढवले असून, त्यांना तातडीने न्याय मिळावा, अशी मागणी वंचित बहुजन आघाडीने केली.
यावेळी वंचित बहुजन आघाडीच्या पदाधिकाऱ्यांनी अतिरिक्त आयुक्तांसोबत बैठक घेऊन हा विषय सविस्तर मांडला. त्यावर अतिरिक्त आयुक्त रोहिदास दोरगुळकर यांनी कामगारांचे थकीत वेतन अदा होईपर्यंत दिग्विजय इंटरप्राइजेस या ठेकेदाराला कोणतीही रक्कम अदा केली जाणार नाही, असे स्पष्ट आश्वासन दिले. तसेच संबंधित कामगारांना त्यांचा थकीत पगार लवकरात लवकर मिळेल, अशी ग्वाहीही त्यांनी दिली.
या बैठकीस वंचित बहुजन आघाडीचे जिल्हाध्यक्ष दीपक पवार, वरिष्ठ नेते आनंदजी आढाव, शहराध्यक्ष कुणाल पिंपळे, तालुकाध्यक्ष सुनील आहिरे, एकनाथ पगारे, समाधान महिरे, सिद्धार्थ उशिरे, सचिन चव्हाण यांच्यासह इतर पदाधिकारी उपस्थित होते.
