Maharashtra State Road Transport Corporation : प्रवाशांना दिलासा! १५ ऑगस्टपासून ‘लालपरी’चे लाईव्ह लोकेशन पाहता येणार

महाराष्ट्र राज्य मार्ग परिवहन महामंडळ (MSRTC) अर्थात एसटी प्रवाशांसाठी एक आनंदाची बातमी समोर आली आहे.आता एसटीसाठी तासन्तास वाट पाहण्याचा अनावश्यक त्रास कायमचा संपणार आहे. येत्या १५ ऑगस्टपासून प्रवाशांना त्यांच्या लाडक्या ‘लालपरी’चे लाईव्ह लोकेशन पाहता येणार आहे. राज्याचे परिवहन मंत्री प्रताप सरनाईक यांनी ही माहिती दिली. (Maharashtra State Road Transport Corporation)

लाईव्ह लोकेशन कसे तपासणार?

प्रवाशांनी काढलेल्या तिकिटावरील ट्रिप कोड वापरून एसटीच्या ॲप्लिकेशनमध्ये बसचे लाईव्ह लोकेशन तपासता येणार आहे. या ॲपमध्ये प्रवाशांना केवळ त्यांच्या बसचेच नव्हे, तर इतर मार्गांवरील गाड्या, त्यांची वेळ आणि थांबे यांचीही माहिती उपलब्ध होईल. यासाठी मुंबईतील मध्यवर्ती कार्यालयात एक अद्ययावत नियंत्रण कक्ष (Control Room) स्थापन करण्यात आला आहे. (Maharashtra State Road Transport Corporation)

प्रवाशांची सोय व्हावी यासाठी एसटी बसेसमध्ये जीपीएस (GPS) बसवण्याचे आणि ॲप्लिकेशन तयार करण्याचे कंत्राट कोरोना साथीच्या आधीच एका खासगी कंपनीला देण्यात आले होते. २०१९ मध्ये तत्कालीन परिवहन मंत्री दिवाकर रावते यांनी हे ॲप्लिकेशन लाँच केले होते.

हे काम सहा महिन्यांत पूर्ण होणे अपेक्षित होते, मात्र ते अद्याप पूर्ण झाले नव्हते. आतापर्यंत १२ हजार बसेसमध्ये जीपीएस बसवण्यात आले आहे. सध्या राहिलेल्या उर्वरित बसेसमध्ये ते बसवण्याचे काम सुरू आहे. एसटी महामंडळाने या संदर्भात एक पत्रिका देखील प्रसिद्ध केली आहे. (Maharashtra State Road Transport Corporation)

ज्यामध्ये एसटी तिकिटावरील क्रमांकावरून बस एसटी स्टँडवर येण्याची नेमकी वेळ कळणार असल्याचे नमूद केले आहे. या सुविधेमुळे एसटी प्रवास अधिक सुरक्षित, परवडणारा आणि आता अधिक सोयीस्कर होईल अशी अपेक्षा आहे, ज्यामुळे सामान्य प्रवाशांना मोठा दिलासा मिळेल.