रायगड : रायगड जिल्ह्यातील आंबेनळी घाट, जो पोलादपूरहून महाबळेश्वरला जोडणारा एक महत्त्वाचा मार्ग आहे, तो आता १५ ऑगस्ट २०२५ पर्यंत अवजड वाहनांसाठी पूर्णपणे बंद ठेवण्यात आला आहे. याशिवाय, रात्रीच्या वेळी आणि अतिवृष्टीचा रेड किंवा ऑरेंज अलर्ट असताना सर्व प्रकारच्या वाहनांसाठी वाहतूक बंद राहील.
गेल्या काही दिवसांपासून आंबेनळी घाटात दरडी कोसळण्याच्या घटनांमध्ये लक्षणीय वाढ झाली आहे. महाबळेश्वर खोऱ्यात आणि पोलादपूर परिसरात पावसाचा जोर वाढल्याने, या मार्गावर सात ते आठ ठिकाणी दरडी कोसळल्या आहेत. काही दिवसांपूर्वीच एका मोठ्या दरडीमुळे हा मार्ग पाच दिवसांसाठी बंद ठेवण्यात आला होता.
या पार्श्वभूमीवर, जिल्हा प्रशासनाने आता पावसाळा संपेपर्यंत अवजड वाहनांना या मार्गावरून प्रवास करण्यास मनाई केली आहे. या निर्णयामुळे कोकणातून महाबळेश्वरकडे जाणाऱ्या अवजड वाहतुकीसाठी एक महत्त्वाचा पर्याय बंद झाला आहे.
