लातूर : लातूर मध्ये प्रभागातील भूमिगत गटार वाहिनीचे काम दर्जेदार पद्धतीने आणि वेळेत पूर्ण व्हावे, तसेच नागरिकांना कोणत्याही समस्येचे सामना करावे लागू नये यासाठी वंचित बहुजन आघाडीचे लातूर महानगरपालिकेचे नगरसेवक सचिन गायकवाड यांनी संबंधित अधिकारी, अभियंते आणि कंत्राटदारांसह कामाची प्रत्यक्ष पाहणी केली.
प्रभागातील आरोग्यविषयक समस्या दूर करण्यासाठी आणि सांडपाणी व्यवस्थापन सुधारण्यासाठी भूमिगत गटार वाहिनीचे काम सध्या वेगाने सुरू आहे. या पार्श्वभूमीवर गायकवाड यांनी काम सुरू असलेल्या विविध ठिकाणांना भेट देऊन कामाच्या गुणवत्तेची तपासणी केली.
यावेळी त्यांनी गटार वाहिनीसाठी वापरण्यात येणारे साहित्य व पाईप्स उच्च दर्जाचे असावेत, अशा स्पष्ट सूचना संबंधितांना दिल्या. तसेच कामादरम्यान नागरिकांना होणारी गैरसोय कमी करण्यासाठी आवश्यक उपाययोजना करण्याचे निर्देश दिले.
तसेच काम सुरू असलेल्या ठिकाणी योग्य बॅरिकेडिंग, सुरक्षेची व्यवस्था आणि वाहतुकीचे नियोजन करण्यात यावे, अशी सूचना कंत्राटदाराला करण्यात आली. भूमिगत गटार वाहिनीचे काम निर्धारित मुदतीत पूर्ण करून खोदलेले रस्ते तातडीने पूर्ववत करण्यासाठी कामाचा वेग वाढवण्याचे निर्देशही देण्यात आले.
यावेळी सचिन गायकवाड यांनी सांगितले की, भूमिगत गटार वाहिनीचे काम पूर्ण झाल्यानंतर परिसरातील सांडपाण्याची समस्या मोठ्या प्रमाणात कमी होईल. तसेच नागरिकांच्या आरोग्याच्या दृष्टीनेही हा प्रकल्प महत्त्वाचा ठरणार असून प्रभागाच्या विकासाला चालना मिळणार आहे.
