– संजीव चांदोरकर
“सुमो” कुस्तीगीर सारख्या अवाढव्य प्रतिस्पर्ध्याला , छोट्या चणीच्या, पण अनेक दशके नियमित व्यायाम आणि मातीतील कुस्तीची प्रॅक्टीस करणाऱ्या.. प्रतिस्पर्ध्याने जेरीस आणले.
इस्लामाबाद वाटाघाटींमध्ये लेबनॉन मध्ये देखील शस्त्रसंधी लागू झाला पाहिजे म्हणून आग्रह धरणाऱ्या इराणला…वाटाघाटींच्या दुसऱ्या फेरीसाठी राजी करण्यासाठी, ट्रम्प यांनी मोकाट सुटलेल्या नेत्यानाहू रक्तपिपासू गुंडाला लेबनॉन वर बॉम्ब टाकण्यास बंदी (prohibited) घातली.
प्रतिसाद देत इराणने देखील हॉर्मुझ व्यापारी जहाजांसाठी खुली करण्याचा निर्णय घेतला
अर्थात आपल्याला फक्त घोषणा झाल्या की बातम्या मिळतात. पडद्याआड अनेक पातळ्यांवर स्क्रिप्ट लिहिले जाते. त्यात बदल केले जातात. कोणी ,काय, केव्हा म्हणायचे हे ठरते.
इराणने जाहीर केले आहे की हॉर्मुझ फक्त व्यापारी जहाजांसाठी असेल, हा मुक्त मार्गाचा कालावधी शस्त्रसंधी जोपर्यंत असेल तोपर्यंतच असेल, इराणने नेमून दिलेल्या समुद्री मार्गावरून जहाजे येजा करतील आणि जहाजांना इराणची परवानगी घ्यावी लागेल. कोणत्याही प्रकाराचा टोल भरण्याचा मात्र उल्लेख नाही.
ट्रम्प यांनी इराणच्या निर्णयाचे स्वागत केले. पण हे देखील सांगितले की इराण बरोबरच्या वाटाघाटीत कायमस्वरूपी तोडगा निघत नाही तोपर्यंत अमेरिकेचे नौदल हॉर्मुझ मध्ये नाकेबंदी सारखे उभे असेल.
उघड आहे की मधल्या काळात अमेरिका आणि इराण एकमेकाचा अंदाज घेत राहणार आहेत.
अमेरिकेने, इस्रायलच्या प्रभावाखाली इराणचा एवढी वर्षे दुस्वास केला आहे, मागच्या वर्षी वाटाघाटी अंतिम टप्प्यात आलेल्या असताना अचानक हल्ला केला…त्यामुळे प्रचंड अविश्वास तयार झाला आहे. मधला काळ कॉन्फिडन्स बिल्डिंगचा असणार.
कसेही असले तरी सर्वांच्या/ जगाच्या दृष्टीने नक्कीच चांगली बातमी आहे.
दहा दिवस तर दहा दिवस, अजून वाढवा शस्त्रसंधी, दुसरी, तिसरी, चौथी वाटाघाटींची फेरी होऊदे…पण तलवारी म्यानात राहिल्या पाहिजेत एवढीच इच्छा आहे सर्वांची
