मध्यपूर्वेत सुरू असलेल्या संघर्षाचे परिणाम आता भारतातही जाणवू लागले आहेत. इराण, अमेरिका आणि इस्त्रायल यांच्यात मागील आठवड्यापासून सुरू असलेल्या तणावपूर्ण लढाईमुळे जागतिक ऊर्जा पुरवठ्यावर मोठा परिणाम झाला आहे. या संघर्षात इराणने अमेरिकेच्या लष्करी तळांवर तसेच आखाती देशांमधील काही तेल आणि गॅस प्रकल्पांवर हल्ले केल्याची माहिती समोर आली आहे.
सौदी अरेबिया, दुबई, कतार, कुवेत आणि इराकसारख्या देशांमधील ऊर्जा प्रकल्पांवरही या तणावाचे पडसाद उमटले आहेत.
या परिस्थितीत इराणने एक महत्त्वाचा समुद्री मार्ग बंद केल्याने जागतिक स्तरावर तेल आणि गॅस पुरवठ्याची साखळी विस्कळीत झाली आहे. भारताला मोठ्या प्रमाणावर एलपीजी गॅस याच मार्गाने आयात केला जात असल्यामुळे पुरवठ्यात अडथळे निर्माण झाले आहेत. त्यातच काही गॅस प्रकल्पांवर झालेल्या हल्ल्यांमुळे अनेक देशांनी तात्पुरते उत्पादन कमी किंवा बंद करण्याचा निर्णय घेतला आहे.
या पार्श्वभूमीवर भारतात एलपीजी गॅसच्या संभाव्य तुटवड्याची शक्यता व्यक्त केली जात आहे. त्याचा परिणाम म्हणून घरगुती गॅस सिलिंडरच्या दरात 60 रुपयांची वाढ करण्यात आली आहे, तर व्यावसायिक गॅस सिलिंडरच्या किंमतीत 115 रुपयांनी वाढ करण्यात आली आहे. हे नवे दर आजपासून लागू झाले असून संबंधित कंपन्यांच्या अधिकृत वेबसाइटवरही ते अपडेट करण्यात आले आहेत.
दरम्यान, वाढत्या तणावामुळे पुरवठा व्यवस्थेवर ताण वाढण्याची शक्यता लक्षात घेता केंद्र सरकारने औद्योगिक आणि व्यावसायिक वापरासाठी दिला जाणारा गॅस पुरवठा तात्पुरता थांबवण्याचा निर्णय घेतल्याची माहिती समोर आली आहे. त्यामुळे अनेक गॅस प्लांट्सनी नवीन ऑर्डर स्वीकारणे बंद केले असून पुढील काही दिवसांत व्यावसायिक गॅस पुरवठा पूर्णपणे बंद होण्याची शक्यता व्यक्त केली जात आहे.
इराण, इस्राईल आणि अमेरिका या युद्धाचे पडसाद आता भारतीय बाजारपेठेत उमटू लागले असून त्याचा फटका सर्वसामान्य नागरिकांनाही बसण्याची चिन्हे दिसत आहेत.
